Ukrainağa qarşı cenkte iştirak etken Rusiye arbiyleri işğal etilgen Qırımnıñ cenübiy yalısındaki "Artek" bala lagerinde reabilitatsiya keçeler.
Çiçek ayınıñ 11-nde Ukraina Silâlı quvetleriniñ mahsus operatsiyalar quvetleriniñ komandanlığı yanındaki bölük — Milliy muqavemet merkezi (MMM) Facebook saifesinde bu aqqında haber etti.
MMMniñ malümatına köre, bu şifahane bazasında Ukrainağa qarşı cenkleşken Rusiye Silâlı quvetleriniñ eñ az 30 arbiyi raatlandı. "Ukraina balaları sürgün etilgende, ruslaştırılğanda ve tasil ve telükesizlik aqqından marum etilgende — qatillerge rahatlıq ve "sağlığını tüzetmek içün müit" yaratıla", — dep Milliy muqavemet merkezi qayd etti.
Hatırlatamız ki, daa evel MMM, Rusiye işğalcileri Ukrayin balalarını Qırımdaki "Artek" lagerine yaz "terbiyelev" cedveline kirsetkenini bildirgen edi. Olar anda vaqtınca işğal etilgen Zaporijjâ vilâyetinden 70-ten çoq adamnı yollamağa planlaştıralar.
İşğal etilgen Qırımda sanktsiya altında olğan "Artek" lageri aqqında ne bilemiz
Qırım işğalinden soñ Rusiye akimiyeti "Artek" bala merkezini "milliyleştirdi", soñra mülküni Rusiyege berdi.
Ukraina Tış işler nazirligi UNESCO, halqara teşkilâtlar ve dünya toplulığını "Artek"niñ Rusiye Federatsiyasına berilmesini takbih etmege çağırdı. Nazirlik qayd etti ki, 2006 senesi Ukrayina ükümeti ve UNESCO arasında "Artek" halqara bala merkezi" Ukrayina devlet müessisesi içün UNESCO imayesi altında merkez statusınıñ berilmesi aqqında añlaşma imzalandı.
QMC prokurorlığı 2015 senesi çiçek ayında işğal etilgen Qırımda "Artek"niñ "milliyleştirilüvi" sebebinden cinaiy dava açtı. 2016 senesi çiçek ayında Kıyivniñ Obolon mahkemesi "Artek" mülküni tevqif etti. Qırım işğal etilgen soñ "Artek" Ukrayina qıtaiy qısmına köçti ve Kıyiv civarındaki Puşça-Vodıtsâ şeerinde bulundı. Rusiyeniñ Ukrayinağa istilâsı başlağan soñ müessise Kıyiv vilâyetinden Zakarpattâğa tahliye etildi.
Avropa Birligi, yarımada işğalinden berli Rusiye Federatsiyasınıñ Tasil nazirliginiñ nezareti altında bulunğan "Artek" lagerine qarşı sanktsiyalar kirsetti.
2023 senesi arman ayında AQŞ Ukrayinadan balalarnı zorbalıqnen alıp ketken Rusiyeden bir sıra uquqiy ve fizikiy şahıslarğa qarşı sanktsiyalar kirsetti. Cedvelge Rusiyeniñ "Artek" Halqara bala merkezi" Federal devlet bücet tasil müessisesi de kirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
