Çiçek ayınıñ 9-nda Avropa Şurası Parlament Assambleyası (AŞPA) ilk sefer 2014 senesinden başlap, hususan Qırımnıñ işğali sebebinden, Rusiye tarafından Ukrainağa ketirilgen zararlarnı köz ögüne almaq kerekligini añlatqan rezolütsiyanı qabul etti. Vesiqada qayd etilgenine köre, halqara tazminat mehanizmleri RF istilâsından zarar körgen er kesni, şu cümleden işğalden zarar körgen yarımada sakinlerini qaplap almaq kerek.
AŞPAnıñ saytında derc etilgen "Rusiyeniñ Ukrainağa qarşı tecavuz cenki: mesüliyetke çekmek, cezasız qalmamaq kerekligi" rezolütsiyasınıñ metninde bu aqqında aytıla.
Mütenasip vesiqa, Ukrainağa tazminat bermek içün qurulğan Zarar cedveli 2014 senesinden başlap olğan vaqialarğa kenişletilgenini qayd ete. Bu, Qırımnıñ işğali, Ukrainanıñ şarqında ve 2014 senesinden başlap Rusiyeniñ diger istilâsı neticesinde olğan zararlarnı köz ögüne ala.
"Böyle bir keñişlev, Rusiye tecavuzınıñ fedaları, şu cümleden Qırımnıñ işğali, Ukrainanıñ şarqındaki cenk ve diger tecavuz areketlerinden zarar körgenler adalet ve tazminat ala bileceklerini kefil etecek. Cedvelniñ Rusiye Federatsiyasınıñ soñki on yıl içinde yapqan areketleriniñ tam miqdarını tam şekilde aks ettirmesi müimdir", — dep Ukraina prezidentiniñ Qırım MCdeki temsilciligi añlattı ve Rusiye yarımadada yapqan cinayetleriniñ halqara seviyede tanınmasını yıllarca talap etkenlerini qoştılar.
Rezolütsiya şunı da destek ete:
- Zararlar cedvelinde 7 yañı dava kategoriyasınıñ açılması, hususan aileniñ ğayıp oluvı, cınsiy zorbalıq, işkence, insaniyetsiz ya da itibarını aşalağan areketler, ağır beden yaraları;
- Ukraina içün iddialarnı baqqan halqara eyyetiniñ meydanğa ketirilmesi boyunca resmiy muzakerelerniñ başlanması ve Avropa Şurasınıñ açıq konventsiyasına qol tutıp, aza devletlerini bu yönelişte tez ilerilemege çağıra;
- Cedvelniñ cemaat teşkilâtları, milliy akimiyet organları ve halqara ortaqlarnen, hususan, Vatandaşlıq cemiyeti koordinatsiya platforması vastasınen işbirligi yapmasını ve muhtemel arizacılarğa daa faal şekilde malümat bermege teşviq ete;
- Tecavuz cinayeti içün mahsus mahkemeniñ meydanğa ketirilmesini ve onıñ yurisdiktsiyasınıñ Belarusiye reberligi ve Şimaliy Koreyağa tarqatılmasını destekley.
Aynı zamanda AŞPA Rusiye Federatsiyasınıñ Cedvelni "istenilmegen teşkilât" olaraq tanımaq qararını takbih ete.
Bundan da ğayrı, Assambleya bütün devletlerni işğal etilgen topraqlarda ve Rusiyede Ukrain arbiy esirleri, vatandaş ve siyasiy mabüslerine qarşı qullanılğan azaplar içün Rusiye Federatsiyası ve Belarusiyeni mesüliyetke çekmege çağıra.
"AŞPA, barışıq muzakereleri cenkniñ insaniy ölçevine, şu cümleden cenk esirleriniñ ve qanunsız tutılğan vatandaşlarnıñ azat etilmesine, Rusiye Federatsiyasına ve Belarusiyege qanunsız sürgün etilgen ya da Ukrainanıñ vaqtınca işğal etilgen topraqlarına mecburen köçürilgen balalarnıñ telükesiz qaytuvı ve reintegratsiyasına ait olmalı, dep tüşüne", — dep temsilcilik qayd etti.
Müessiseniñ bildirgenine köre, bu vesiqa halqara toplulıq "Rusiye Federatsiyasınıñ, hususan Qırımda, yapqan cinayetleriniñ terenligini körgenini ve zarar körgenler içün adaletniñ tiklenmesine qol tutqanını tasdıqlay".
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
