İşğal etilgen Qırımnıñ Bağçasaray şeerinde ruslar "Genç komandanlar mektebi"ni açtılar. Bu, yarımada ve vaqtınca işğal etilgen Herson vilâyetiniñ 120 balası içün kurstır. On kün içinde gençlerge taktik, tibbiy azırlıq, silâ qullanmağa ve maşna aydamağa ögretildi.
Çiçek ayınıñ 8-nde Ukraina Silâlı quvetleriniñ mahsus operatsiyalar quvetleri komandanlığı yanındaki bölük olğan Milliy muqavemet merkezi (MMM) Facebook saifesinde bu aqqında haber etti.
"Tasil" adı altında yaşlar içün açıq arbiy talimler keçirile: cenk medeniyetini ögretüv, askerlik azırlığı ve milliy añnıñ yoq etilmesi", — dep MMM qayd etti.
Qayd etildi ki, bu halqara uquqnıñ bozuluvı ve Jeneva şartnamesi tarafından yasaq etilgen arbiy cinayet sayıla.
Milliy muqavemet merkezi vaqtınca işğal etilgen topraqlarnıñ sakinlerini balalarını Rusiye teşviqatına ve "arbiy-vatanperverlik kursları"na celp etmemege çağırdı.
Mütenasip "Genç komandanlar mektebi" endi işğal etilgen Qırımnıñ bir qaç şeerinde, hususan Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad), Foros ve Alupkada çalışa.
"Almenda" vatandaş maarif merkeziniñ yolbaşçısı Mariya Sulâlinanıñ bildirgenine köre, 2025 senesi çiçek ayına qadar Qırımda 260 kadet sınıfı çalışa. Bu, keçken senege köre 63-ke çoq. Umumen yarımadanıñ mekteplerinde arbiy işlerni 6 265 bala ögrene.
Aynı zamanda bu ukrain teşkilâtınıñ malümatına köre, Herson vilâyetiniñ işğal etilgen qısmında 9, Zaporijjâ vilâyetiniñ duşman kontrol etken topraqlarında — 13, Lugansk vilâyetinde — 86 kadet sınıfı çalışa. Donetsk aqqında iç bir malümat yoq.
Hatırlatamız ki, işğal vaqtında Qırımda 200 biñden çoq bala doğdı. Olar haber izolâtsiyası şaraitinde, rusiye teşviqatınıñ tesiri altında ösip, özleri rus olğanları ve Ukrainanı duşman olaraq körgenlerini ögrendiler. Ukraina prezidentiniñ Qırım Muhtar Cumhuriyetindeki temsilciligi, bu balalarnıñ Ukraina medeniy ve malümat alanına qaytması eñ az on yılğa kerek olacaq, dep saya.
Devlet ögündeki çağıruvlar ve işğal etilgen topraqlardan gençlerniñ reintegratsiyası strategiyası aqqında — Suspilne Qırım muarririyeti ögrendi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
