Rusiye Qırım ve vaqtınca işğal etilgen diger topraqlarda haber alanı nezaretini quvetleştire. Bu, hususan, "Roskomnadzor"nıñ saban ayınıñ 31-nde internet qullanıcılarınıñ faaliyeti aqqında malümat toplav buyruğınen bağlıdır.
Çiçek ayınıñ 3-nde Ukraina prezidentiniñ Qırımdaki temsilciligi bunı bildirdi.
Rusiye provayderleriniñ toplaycağı mecburiy malümat cedveline aşağıdakiler kire: İnternet ağına qoşulğan bütün cihazlarnıñ IP adresleri, geolokatsiya malümatı, ağğa kiriş içün qullanılğan bütün cihazlarnıñ identifikatorları, qullanılğan programma teminatı ve İnternet trafigi aqqında malümat.
"Bu, istilâcı devletniñ işğal etilgen topraqlarda ealini nezaret etmek ve er angi narazılıq numayışlarını bastırmaq içün daa bir ıntıluvıdır. Bu közetüv sistemasınıñ kirsetilmesiniñ aqibetleri pek menfiy ola bilir: anonimlikniñ bütünley ğayıp etilmesi, bloklav ve tsenzuranıñ telükesi bayağı artması, vatandaşlarnıñ şahsiy ayatı közetile, Ukraina tarafdarları olğan ealige basqı quvetleştirile", — dep aytıla haberde.
Temsilcilik işğal etilgen topraqlarnıñ sakinlerini ağnı qullanğanda diqqatlı olmağa çağırdı.
"İşğalli memuriyet Rusiye qanunlarını, hususan "aşırıcılıq" ve "terrorizm" qaidelerini, fikir farqlılığını bastırmaq, söz serbestligini sıñırlamaq ve Ukraina tarafını tutqan ya da işğalli rejimni tenqit etken şahıslarnı qorquzmaq içün qullana", — dep Temsilcilik bildirdi.
Hatırlatamız ki, "VİETdaki cemaatnıñ vaziyeti: havfsızlıq, yardımlaşuv, vatandaş faalligi" tedqiqatına köre, Rusiye teşviqatçıları işğal etilgen topraqlarnıñ, hususan Qırımnıñ, sakinlerini Ukraina olarnı beklemey, dep inandırmağa tırışa. Rusiye nezareti altındaki kütleviy haber vastaları, VİETdan qaytqanlarnı Ukraina akimiyeti cezalaycaq, dep bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
