İşğalli Qırım Yuqarı makemesi Yalta sakinini umumiy rejimli müstemlekede "çetel devletinen işbirlik yapqanı" içün 5 yıl ve 25 künge üküm etti.
Çiçek ayınıñ 3-nde yarımadanıñ işğalli prokurorlığı bunı bildirdi.
Rusiye akimiyetiniñ kontrol etkeni "taqiqat"nıñ malümatına köre, 31 yaşındaki adam 2023 senesi oraq ayından 2024 senesi saban ayına qadar Ukraina Mudafaa nazirliginiñ temsilcilerinen messencer vastasınen subetleşken edi.
"2023 senesiniñ soñunda o, Yalta civarında RF Silâlı quvetleriniñ yerleşüv yerleriniñ ve Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda — terciman) arbiy gemilerniñ foto ve videolarını çıqardı. Bu malümatnı o, öz muarririyetine içtimaiy ağnıñ çatbotı vastasınen yolladı", — dep aytıla haberde.
Hatırlatamız ki, saban ayınıñ 24-nde "Tribunal. Qırım epizodı" uquq qorçalayıcı teşebbüsi bildirdi ki, Qırım sakinleri "aşırıcılıq" maddeleri boyunca cinaiy mesüliyetke sıq-sıq çekile. Böylece, bu qışta böyle üç adise qayd etildi, ve daa eki — 2025 senesi saban ayına qadar.
QırımSOSnıñ malümatına köre, 2024 senesi Qırımnıñ işğalli makemeleri ve Rusiye Federatsiyasınıñ birinci instantsiya makemeleri eñ az 66 insannı qanunsız şekilde maküm etti, 25 insannıñ davalarını apellâtsiya makemeleri baqtı, 33 insannıñ davalarını ise kassatsiya makemeleri baqtı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
