Poloniyadaki Ukraina elçisi Vasıl Bodnar, saban ayınıñ 27-nde Pariste prezident Volodımır Zelenskıynıñ iştirakinen keçirilgen "İstegenler koalitsiyası" sammitiniñ neticelerinden soñ, iç bir kimse Qırım ya da Donbasnen bağlı topraq teslimatlarına razı olmaycağını bildirdi.
O, saban ayınıñ 28-nde RMF FM canlı yayınında bunı bildirdi.
"Biz o qadar qan töktik, o qadar çoq ödedik ki, kimse ne Qırım, ne Donbas içün bir de bir imtiyaznı qabul etmez. Siyasiy ceetten soñki Rusiye askeri Ukrainadan çıqqanına qadar küreşecekmiz", — dep diplomat ayttı.
Onıñ aytqanına köre, "tek vaqıt meselesi", Qırımnı arbiy ya da diplomatik yollarnen azat etecekler.
Bodnarnıñ fikrince, erte ya da keç Amerika Qoşma Ştatları de Rusiye diktatorı Vladimir Putinge qol tutmaq kerek degil, dep qarar alacaq.
"Olar üçünci cian cenkinden qorqalar, ve bu yönelişte keteler, çünki istilâcığa qol tutalar. Biz öz çizgimizge riayet etmek kerekmiz: topraq bütünligi, cenk içün mesüliyetlik ve Ukrainanıñ ğayrıdan qurulmasına isse qoşmaq", — dep qoştı o.
"İstegenler koalitsiyası" aqqında ne belilemiz
Saban ayınıñ 2-nde Büyük Britaniya baş naziri Kir Starmer, Büyük Britaniya ve Frenkistan Kıyivnen beraber Vaşingtonğa barışıq planını taqdim eteceklerini bildirdi. Onıñ aytqanına köre, böyle añlaşmalar Zelenskıy ve Frenkistan lideri Emmanuel Makronnen muzakerelerden soñ tizildi. Bundan ğayrı, Starmer qayd etti ki, bu işke daa bir ya da eki devlet qoşula bile.
Saban ayınıñ 15-nde Starmer Ukrainada barışıq qurulmasına yardım etmege razı olğan 25 dünya liderinden ibaret "istegenler koalitsiyası"nıñ onlayn körüşüvini keçirdi. Avropa Birligi, NATO, Kanada, Avstraliya ve Yañı Zelandiyanıñ vekilleri qoşuldı.
Körüşüvde prezident Zelenskıy da iştirak etti, bundan soñ o, bir aftadan soñ Ukrainağa qol tutmaq içün ortaqlarnıñ daa bir körüşüvi teşkil etilecegini bildirdi. Devlet yolbaşçısınıñ aytqanına köre, Ukrainağa qoltutuv körüşüvlerini "aman er afta" keçirmek müimdir.
Bloomberg, Büyük Britaniya ve Frenkistan, cenkniñ bitmesi aqqında muzakerelerde Ukrainanıñ yerini pekitmek içün plan azırlamağa tırışqanlarını ögrene.
Ateş toqtatılmasına dair teşebbüs
Kiçik aynıñ 18-nde AQŞ ve Rusiye delegatsiyaları Saudiy Arabistanda körüştiler. Olar memleketler arasındaki iqtisadiy ve diplomatik munasebetlerni muzakere ettiler. Rusiye Federatsiyası ve AQŞ vekilleri diplomatik missiyalarnıñ yañıdan açılması, elçilerden memleketlerniñ tayin etilmesi aqqında añlaştılar.
Olar Rusiye-Ukraina cenkini de muzakere ettiler. Tramp memuriyetiniñ vekilleri, cenkte "er taraf" cenkni "soñlatmaq" içün bir şeyler yapmalı, dep bildirdiler. Rusiye temsilcileri cenkniñ toqtatıluvı içün "diplomatik ğayretler kerek olğanını" bildirdi. Ukraina bu muzakerelerde iştirak etmedi.
Saban ayınıñ 11-nde Saudiy Arabistanda Ukraina ve AQŞ temsilcileri arasında muzakereler olıp keçti. Neticesinde, Ukraina, AQŞnıñ 30 künlik ateş toqtatılmasına dair teklifini qabul etmege azır olğanını bildirdi.
Saban ayınıñ 18-nde Tramp Putinnen telefon etti. Beyaz ev ve Kremlniñ bildirgenine köre, Tramp ve Putin energetik obyektlerge ücüm etmekten vazgeçip, deñizde tınçlıq rejimini kirsetmek içün muzakereler başlağanını añlaştılar. Amma Putin ateş toqtatılmasına razı olmadı, cenkni toqtatmaq içün Ukrainağa arbiy yardım ve istihbarat berilmesini toqtatmaq "esas şart"tır, dep ayttı.
Saban ayınıñ 19-nda Tramp Zelenskıynen telefonda laf etti. Ukraina prezidenti, energetikağa ücüm toqtatılmasına qol tutqanını bildirdi, amma bu, ruslarnen qarşılıqlı olmalı. Bundan da ğayrı, olar öz taqımlarına ateşniñ qısmen toqtatılması rejiminiñ amelge keçirilmesi ve keñleştirilmesinen bağlı tehnikiy meselelerni çezmege avale etmege añlaştılar.
Saban ayınıñ 23-nde Zelenskıy saban ayınıñ 11-nden berli ateş tamamınen toqtatılmasını teklif etkenini bildirdi, amma Rusiye Ukraina toprağına ücüm etmege devam ete.
Telegram, WhatsApp, Facebook, TikTok ve YouTubeta Suspilne Qırım haberlerine abune oluñız
