Uquq qoruyıcılar halqara teşkilâtlarnen beraber BMT-de Qırımda ve başka işğal etilgen territoriyalardaki Rusiyeniñ muntazam cenk cinayetleriniñ isbatlarını kösterdiler. "İnsaniyetligine qarşı cinayet olaraq işkence ve qanunsız tutıp aluvları" serlevalı tedbir, saban aynıñ 19 Jenevada insan aqları boyunca BMT Şurasnııñ 58-ci sessiyası vaqtında ötkerilgen.
Bunıñ aqqında İnsan aqları oğrunda medialı teşebbüsı (İAOMT) bildire.
İAOMT, Rusiyenen qanunsız tarzda tutulğan 1 908 grajdan insannı qayd etken.
"Bu cinayetlerni talil eterek, Rusiye, işğalni tanımağa red etken ukrainlerniñ keñ zümresini taqip etkenini köremiz. Olar faal olmağanına baqmadan ilk nişanları olalar. Grajdan insanlarnıñ taqip etüvleri insaniyetligine qarşı cinayeti kibi baqılmalılar", – dedi İAOMT talil departamentiniñ reberi Lübov Smaçılo.
O, büyük Britaniya, Poloniya, Litvaniya, Yunanistan, Finlândiya, AQŞ, Almaniya, Bulğaristan, Felemenk, İsviçre, İslandiya, Meksika, Slovakiya, Gürcistan ve Estoniyadaki vekillerini grajdanlarnıñ serbest etüvine dair teşebbüsnen işlep çıqarılğan areket planınıñ kerçekleştirüvine qatnamağa çağırğan. Uquq qoruyıcılar grajdanlarnı ayrı zümrelerge bölmege çağıralar. Meselâ, yaş, cınıs, zenaatına köre bölip olarnı ayrı devletlerge tayin etip bu ülkelerni insanlarnıñ ayrı sırasınıñ serbest etüvinen oğraşmağa imkân yaratmağa.
Qırımdaki tutıp aluvlar 2014 seneden itibaren sürmekteler – qanunsız apis etüvlerni Rusiye işkencelerniñ daa bir usulı olaraq qullana, qayd ete Qırım uquq qoruyıcı gruppasınıñ halqara advokatçılığınıñ meneceri İrına Baran El Ghali.
"Qırım işğalniñ bütün vaqıt içinde, ya o endi 11 yıldan ziyade, iç bir cinayetçi cezasını çekmegen. Teşkilâtımız Qırımdaki işkencelerini yapqan aynı cinayetçiler şimdi işğal etilgen yañı territoriyalarında ukrainlerni işkencelerine oğratqan vaqialar aqqında haberdar ola", – qayd etti o.
Saban aynıñ 11 Ukrainağa dair BMT Tahqiqat komissiyası, ukrain grajdanlar ve arbiy esirlerniñ tecavuziy ğayip oluvlar insaniyetligine qarşı cinayeti olğanını ilk nevbette tayin etken esabatını yayınlağan. Komissiya, bu cinayetlerniñ muntazamiyet, büyük miqyası ve olarnıñ eda etilmesine dair Rusiyeniñ yuqarı reberliginiñ resmiy siyasetiniñ bar oluvını qayd etken.
Hatırlatayıq ki, 2024 senesiniñ soñuna qadar Qırım uquq qoruyıcı gruppasınıñ malümatlarına köre, işğal etilgen Qırımda sahtelengen qabaatlavlar içün eñ azdan 250 Ukraina vatandaşı apiste bulunğan edi. Siyasiy mabuslarınıñ qısmını yarımadada tutalar, başqalarnı – Rusiye territoriyasında.
Telegram, WhatsApp ve Facebookta Suspilne Qırım haberlerine abune oluñız
