Ukrainada "TikTok" içtimaiy ağında bir qaç esap açqan ve alıp barğan Kıyivli Rusiye tarafdarı blogerniñ davası baqılacaq. Anda o, Rusiye Federatsiyasınıñ Ukrainağa qarşı silâlı tecavuzına qol tutqan, ukrain topraqlarınıñ, şu cümleden Qırımnıñ işğaline qarşı çıqqan ve akimiyetni zorbalıqnen deñiştirmege çağırğan videolarnı derc etti.
Qırım ve Sevastopol (Aqyar) prokurorlığınıñ matbuat hızmeti bunı bildirdi.
Qayd etilgenine köre, 35 yaşındaki Kıyiv sakini 2023-2024 seneleri içtimaiy ağlarda Ukraina akimiyetini, hususan prezidenti ve Ukraina Yuqarı Şurasınıñ vekillerini deñiştirmege çağırğan video malümatlarını defalarca tarqatqan edi.
Bundan da ğayrı, adam Ukraina toprağınıñ qısmınıñ, hususan Qırım yarımadasınıñ vaqtınca işğalini red ete.
"2024 senesi orta küz ayında "bloger" Kıyivde tutuldı. O, makeme oturışına qadar apiste qalacaq. O, devlet akimiyetini zorbalıqnen deñiştirmege çağıruvnen malümat tarqatıluvı (Ukraina Ceza qanunnamesiniñ 109-ncı maddesiniñ 3-nci qısmı) ve Ukraina toprağınıñ qısmınıñ vaqtınca işğalini red etüvinen qabaatlana (Ukraina Ceza qanunnamesiniñ 436-2-nci maddesiniñ 3-nci qısmı). Qabaatlanğan şahıs 8 yılğa qadar azatlıqtan marum etüv cezası ve mal-mülkniñ musadere etilmesi üküm etile", — dep aytıla haberde.
Telegram, WhatsApp ve Facebookta Suspilne Qırım haberlerine abune oluñız
