Saban ayınıñ 11-nde Ruslan Mesutovnı Yakutsk 1-nci apishanesinden Tabağa köyündeki hastahanege avuştırğanlar. O, bayıldı ve yürek hastalığı aqqında bildirdi.
Bunı "Qırım birdemligi"ne siyasiy mabüsniñ qız qardaşları tarif etti.
18 yıl apis cezasına maküm etilgen Mesutovnı "Aluşta" diniy cemiyetiniñ azası olğanı içün müstemlekede keçken sene boş ayda etap ettiler. Etaptan soñ onı ceza izolâtorına (ŞİZO) yerleştirdiler ve aman-aman iç bir vaqıt çıqarmadılar, dep teşkilât bildirdi.
"Cezalar Mesutovnıñ masa başında uyquğa ketkeni, vaqıt sorap, diger mabüslernen bağırğanı içün berildi. ŞİZOdan soñ qırımtatar kamera tipli odağa yerleştirildi. Bu, apishaneniñ tükânından tek bir kere aş ala bilgen edi", — dep aytıla haberde.
Azatlıqta, adamnıñ sağlıq meseleleri bar edi, hususan, bel kemiginen hastalıqnı çeke edi. Lıpetsk apishanesinde ise, müstemlekege ketmezden evel, ekimler oña hronik hepatit C diagnozını qoydılar.
"Hepatitnen müstemlekede da bir şey yapmaylar. ŞİZOda o, bayılıp başladı. Soñra ise, onıñ belkemik hastalığı beterleşkenini haber etken mektüpni aldıq. O, suvuqlanmasın dep, tışarı çıqmağa bile qorqqan edi", — dep Mesutovnıñ qız qardaşları tarif ettiler.
Hastahanede qırımtatar 21 kün yatacaq, dep vade eteler. Soy-soplarınıñ aytqanlarına köre, onı tek yürek hastalığı — yüksek qan basımı — ve sıq-sıq bayılğanı sebebinden alıp ketkenler. Birinci müstemlekede ondan da qan teşkerüvleri yapıldı, amma sebebini aytmadılar. Mesutov qan bermege red etken soñ, onı daa 15 künge ŞİZOğa yolladılar, dep soy-sopları qoştılar. Ruslan Mesutovnıñ bel ağrısınıñ sebebi daa belli degil, ekimler diagnoz qoymadılar, amma qorantasına mahsus tibbiy korset yollamağa izin berdiler.
"Etaptan soñ ondan bütün şahsiy eşyaları, şu cümleden ilâcları ve tonometr alındı. Nezaretçiler kamerağa yalıñız qalem ve kâğıt ketirdiler, o, qorantasına cevap mektübi yazsın dep", — dep "Qırım birdemligi"niñ haberinde qayd etildi.
Qorantası qoştı ki, şimdi advokatlar Ruslan Mesutovnı evge yaqın yerleşken müstemlekege avuştırmaq içün makemege dava azırlaylar. Lâkin makemeden cevap kelmedi.
Ruslan Mesutov aqqında ne bilemiz
Mesutov Aluştada musulman diniy cemiyetiniñ tesisçilerinden biri edi ve camide qaravul olıp çalıştı. Em de cemaat faaliyetinen oğraşa, musulman bayramlarını teşkil ete edi, cenazelerge yardım ete, namaz keçire edi.
2019 senesi bozarğan aynıñ 10-nda Qırımda Aluştada dört qırımtatar — Ruslan Nağayev ve Eldar Kantimirov, Küçük Mayak (Büyük Lambat) köyünde — Ruslan Mesutov, İzobilne (Körbekül) köyünde — "Aluşta" yerli din cemiyetiniñ reisi Lenur Halilov tutuldı.
Qırımtatar adamı, terror teşkilâtınıñ faaliyetini teşkil etüvde (RF Cinayet qanunnamesiniñ 205.5 maddesiniñ 1-inci qısmı) ve akimiyetni zorbalıqnen zapt etüvge azırlanuvda (RF Cinayet qanunnamesiniñ 30-ıncı maddesiniñ 1-inci qısmı ve 278-inci maddesi) qabaatlandı.
"Aluşta" din cemiyetiniñ azası Ruslan Mesutov "Aluşta"nıñ davası baqılacaq makeme oturışından eki afta evelsi apiske alındı. Dava, Lenur Halilov yolbaşçılığındaki cemiyetke Nazirler Şurasınıñ emirinen şeer camisi berilgeni sebebinden açıldı. Bu daa 1994 senesi oldı. Daa soñra, teslim etüv aktını lâğu etmeden, cami Qırım musulmanları diniy idaresine (QMDİ) berildi.
Bu davada meraqlanğan şahıslar olaraq Qırım Mülkiyet nazirligi, QMDİ, millet ve din meseleleri devlet eyyeti çıqışta bulundı.
2 yıldan soñ 2021 senesi arman ayınıñ 16-nda Roman Saprunovnıñ yolbaşçılığında Cenübiy bölgeniñ arbiy makemesi "Hizb ut-Tahrir davası"nıñ Aluşta gruppasınıñ mabüslerine üküm çıqardı. Ruslan Nağayev, Eldar Kantimirov, Ruslan Mesutov ve Lenur Halilov terrorizmde qabaatlanıp, 13, 12 ve 18 yıl apis cezasına maküm etildi.
Daa soñra Moskva vilâyetiniñ Vlasisa şeerindeki Apellâtsiya arbiy makemesi, "Hizb ut-Tahrir davası"nıñ Aluşta gruppası mabüsleriniñ imayecileriniñ şikâyetlerini qanaatlendirmedi ve ükümni amelde qaldırdı.
Telegram, WhatsApp ve Facebookta Suspilne Qırım haberlerine abune oluñız
