İşğal etilgen Qırımda rusiye ordusınıñ tenqit etüvi ve Ukrainağa qol tutuvı içün rusiye quvetçileri yerli ealini basqığa oğratmağa devam eteler. İşğal "makemeleri" içtimaiy ağlarda tefsirleri ve Ukrainağa qol tutuvı ve "casuslıqta" şübesi içün para cezaları, apis müddetleri ve tevqiflernen beraber ükümlerni çıqaralar.
Suspilne Qırım, keçken afta içinde yarımada sakinlerine alıp çıqarılğan qanunsız tutıp aluvlar ve ükümlerniñ sırasını çıqarğan.
Volodımır Zelenskıynıñ intervyüsınıñ paylaşuvı içün para cezası
İşğal etilgen Qırımda Ukraina prezidenti Volodımır Zelenskıynıñ intervyusını içtimaiy ağlarda derc etkeni içün adamğa 45 biñ ruble (20 829 ğrıvnâ) para cezası berildi. Onı "Rusiye Federatsiyası ordusınıñ itibardan tüşürüvinde"RF CK 20.3.3 maddesi qabaatladılar.
"Onı, Qırımda Ukraina tarafdarı ya da cenkke qarşı olğan insanlarnı taqip etmek içün qullanılğan Rusiye "cenkke qarşı maddesi"ne esaslanıp qabaatladılar. Amma bu vaziyette Qırım sakini öz lafları içün degil de, Ukraina prezidenti Volodımır Zelenskıynıñ sözleri içün para cezasını aldı", — "Qırım.Aqiqat" leyhasınıñ malümatında.
Yalta sakinini maküm etmege tırışalar.
Qırımda Rusiye işğalcileri Yalta sakinini maküm etmege tırışalar. Uquq qorçalayıcılar adamnı Rusiye Ukrainağa qarşı açqan cenkke razı olmağanında qabaatlaylar. Bu sebepten "taqiqat, adamnıñ Ukraina mahsus hızmetlerine qoşulğanını ve "diversiya azırlağanını" belgiledi.
Qırımnıñ işğalli prokurorlığı bildirgeni kibi, 2022 senesiniñ soñunda Yalta sakini "Ukraina havfsızlıq hızmetiniñ vekillerinen bağ tuttı". Olarğa o, "diversiya ve terroristik areketler" içün yardım köstermege "istegeni"ni bildirdi.
Sevastopolda USQne qol tutqanında qabaatlap yaqaladı
Sevastopolda (Aqyarda) işğalli FSB bir adamnı USQne qol tutqanında qabaatlap yaqaladı. İşğalcilerniñ aytqanlarına köre, adam quvetçilerni öldürmege çağıra, Rusiye prezidentine qarşı çıqa edi ve USQni destekley edi.
Oña qarşı cinaiy dava internette aşırıcılıq faaliyetine çağıruvlar aqqında maqalege binaen açıldı. O, beş yılğa qadar apis cezasına üküm etile bile.
Telegram, WhatsApp ve Facebookta Suspilne Qırım haberlerine abune oluñız
