Qırımda Rusiye işğalcileri Yalta sakinini maküm etmege tırışalar. Uquq qorçalayıcılar adamnı Rusiye Ukrainağa qarşı açqan cenkke razı olmağanında qabaatlaylar. Bu sebepten "taqiqat, adamnıñ Ukraina mahsus hızmetlerine qoşulğanını ve "diversiya azırlağanını" belgiledi.
Qırımnıñ işğalli prokurorlığı bunı bildirdi.
Bildirildi ki, 2022 senesiniñ soñunda Yalta sakini "Ukraina havfsızlıq hızmetiniñ vekillerinen bağ tuttı". Olarğa o, "diversiya ve terroristik areketler" içün yardım köstermege "istegeni"ni bildirdi.
"2024 senesi saban ayında o, mütehassıslardan patlayıcı cihazlarnı ve zarar ketirmek içün ayrı parçalarnı tapıp, olarnı saqlağan yerge qoymaq vazifesini aldı. Adam patlayıcı aletlernen areket etüv esaslarını ögrendi, öz başına yapılğan patlayıcı alet, alıcı ve bericini satın aldı, em de heksogen esasında patlayıcı maddeni yerleştirdi, koordinatlarnı Ukraina havfsızlıq hızmetiniñ hadimine berdi", — dep aytıla haberde.
Bundan soñ adamnı FSB hadimleri tuttılar. Şimdi onıñ "davası" işğalli makemege yollanılacaq.
Telegram, WhatsApp ve Facebookta Suspilne Qırım haberlerine abune oluñız
