Kıyivde kiçik aynıñ 27-nde Qırım platforması çerçivesinde Qırımnıñ işğaline tirenüvniñ 11 yıllığına bağışlanğan "Suvdan kölge" sergisi açıla. Mayısnıñ 30-na qadar devam etecek bu bediiy leyha bütün Ukrainadan kelgen 20-den çoq ressamnı birleştirdi, olarnıñ işleri hatırlavnı işğalge qarşılıq kösterüv ve yarımadanen bağnı ğayrıdan tiklev şekli olaraq tedqiq ete.
Bunı serginiñ teşkilâtçıları bildirdi, dep Suspilne Qırım mühbiri haber etti.
Leyha, bütün ğayretlerge baqmadan, sanat, ananeler ve nesilden nesilge bilgi berüv şeklinde yaşamağa devam etken medeniyet, tarih ve travmatik tecribege muracaat ete. Bu yerde yaratıcılarnıñ ifadeleri tek keçmişni añlamaq içün bir yol degil, kelecek içün küreşmek içün de bir vasta ola.
Leyhanıñ kuratorı Hrıstına Burdım qayd etti ki, merasimniñ ğayesi başta şübeler doğurdı.
"Qırımdan olmağan men ve taqımım bu mevzuda "turistler" olacağımızdan qorqqan edik. Amma qorqqan olsañ, o tarafqa ket, dep aytalar. Ve bu bizler içün büyük bir fırsat oldı, çoqusı siziñ içün de, ümüt etem. Bu sergini ziyaret etkenler içün Qırım aqqında daa çoq bilmek, bilgenlerimizge diqqat etmek, bu bilgilerni arttırmaq kerek olğanını añlamaq, belki de, hatıra mevzusınen oğraşqan yañı ressamlarnı tapmaq imkânı olur, olar ya qırımtatarlar ya da Qırım sakini olğan ukrainliler ola bile. Ve bizim içün bu, Qırım bağlamına kirmek ve inanılmaz bağnı, birlikni is etmek içün acayip bir fırsat oldı", — dep qayd etti o.
Ukraina prezidentiniñ Qırım Muhtar Cumhuriyetindeki temsilcisi Olğa Kurışko leyhanıñ yañılıq olğanını qayd etti. Onıñ aytqanına köre, bu Qırımnı genç ressamlarnıñ işlerinen yañıdan añlamaqtır. Meselâ, yarımadadan ketirilgen çamurdan yaratılğan Katâ Buçatskanıñ resmi ya da qırımtatar ressamı Rustem Skıbinniñ eksperimental işleri.
"Ve daa bir qısmı — Qırım nebatatına ait. Sevgen Qırımımız, hatırlağan Qırımımız — bu eñ büyük qısmıdır. Sergi ögünde bizge resimlernen kelgen Mariya Kulikovska yardım etti. Bu Qırımda ösken ösümlikler. Bu bizim hatırlavımız, ayatımıznıñ duyğusı. Ve menim fikrimce, bizim Qırım aqqında hatırlavlarımız pek romantiktir", — dep qayd etti o.
Serginiñ ayrı bir alanı — yerastaki "Tüşler laboratoriyası", anda ziyaretçiler Qırımnen bağlı bir uyqu ya da hatıra aqqında assotsiatsiya cedvelini yarata bileler. 2014 senesine qadar Qırımda yaşağan Svitlana Konoplövanıñ dijital 3D işi seyircilerni işğalden evelki soñki künlerge alıp kete. O, öz eserinde bu qarşılıqnı hatırlamağa tırışa edi.
"Qırım aqqında aytsaq, biz sıq-sıq ruhiy yara aqqında aytamız, amma men, pek küçlü olğan ve pek çoq insannı köçürgen qarşılığımıznı da hatırlamağa ister edim. Ne de olsa, o vaqıt böyle bir qarşılıq beklemey edim... Haritanıñ bütün parçaları hafızadan tüşkenini körem. Bazı yollar yüklenmey — men olarnı ğayrı yaratıp olamayım. Aqlıma kelgen şeer kezintilerinde körme noqtaları peyda ola", — dep tarif etti.
Olğa Kurışkonıñ qayd etkenine köre, sanat — medeniyetlerara bir köpürdir.
"Bu sergiler, bu işler dünyanı dolaşıp, Qırımnı aks ettirmeli. Sanatnıñ Qırım platformasınıñ bir qısmı olaraq qalması pek müimdir. Ve bu, hususan, maalesef, memleketimizniñ etrafında olğan şaraitte Qırımnıñ taqdirinen meraqlanğan, qarşılıq köstergen memleketlerni celp etmek içün qoşma bir alet kibi ola", — dep qayd etti o.
Telegram, WhatsApp ve Facebookta Suspilne Qırım haberlerine abune oluñız
