Ukraina Qırım siyasiy mabüslerine faal şekilde qol tutmalı, işğal etilgen topraqlarda da derusifikatsiya ve dekolonizatsiyanı kerçekleştirmeli, em de yarımadanıñ devletniñ ayırılmaz bir parçası olaraq kelecegini körmeli. Ukraina ve qırımtatar halqınıñ iştiragi olmadan Qırımnen bağlı bir şey çezilip olamaz.
Refat Çubarov "Tolu miqyaslı cenkniñ üçünci yıllığı: suverenitet içün küreşniñ yañı basamağınıñ esas neticeleri ve esas çağıruvları" munaqaşasında bunı ayttı.
"2021 senesi arman ayında Qırım platforması sammitini hatırlañız. Anda qayd etildi ki, Qırımnıñ azat etilmesi yalıñız barışıqlı dialog, siyasiy ve diplomatik usullar vastasınen mümkün. Amma bir yıldan soñ cenk işğal etilgen bütün topraqlarnıñ, şu cümleden Qırımnıñ azat etilmesinen yekünlenmek kerek olğanını eşitemiz", — dep Çubarov qayd etti.
Siyasetşınas, imtiyazlar aqqında açıqtan aytmasalar da, öz areketlerinen Qırımnıñ imtiyazları aqqında añlatqan bazı çetel siyasetçilerniñ nazar noqtasından qasevetlengenini bildirdi.
"Ukraina tarafından Qırımnıñ azat etilmesi içün yüz biñlernen insannıñ beklevini saqlamaq içün bütün mümkün olğan mesaclarnı bermek kerekmiz", — dep qayd etti o.
Çubarov Qırım siyasiy mabüslerine faal qol tutuv ve yarımadanıñ bütünley azat etilmesine qadar rus teşviqatına qarşı derussifikatsiya, dekolonizatsiya ve dekommunizatsiya boyunca küreşniñ zarurlığına ayrıca diqqat ayırdı.
"Bütün dünya Qırım Ukraina toprağı olğanını tekrar tasdiqlasın dep areket etmeli. Ve onıñ azat etilmesini beklemek kerekmey", — dep Çubarov çağırdı.
O, "Ukrainanıñ tamır halqları aqqında" qabul etilgen qanunnıñ emiyetini hatırlattı ve Ukraina azat etilecek Qırımnıñ kelecegini nasıl körgenine dair açıq bir körüniş yaratmaq kerekligini qayd etti:
"Bu, qırımtatar halqınıñ toprağı ve Ukraina devletiniñ ayırılmaz parçasıdır. Ukraina ve qırımtatar halqı olmadan Qırım aqqında bir şey yoq. Men bellesem, bu nazar noqtaları Ukraina devletiniñ ortaqlarımıznen er angi munasebeti, alâqası, muzakerelerinde quvetleştirilmek kerek", — dep qoştı o.
Telegram, WhatsApp ve Facebookta Suspilne Qırım haberlerine abune oluñız
