Rusiyede Hakasiya cumuhuriyetiniñ Abakan şeerindeki 33-ci icraiy müstemlekesinde cezasını keçirgen qırım siyasiy mabusı Remzi Bekirovğa namaz qılmağa izin bermeyler. Dua içün onı cezahanege yollaylar.
Bunıñ aqqında onıñ ömür araqadaşı Halide Bekirova Facebook-ta yaza.
Onıñ sözlerine köre, uvut aynıñ 20 tahqiqat tevqif hanesine Beikrovnıñ qanunsız keçirilmesine dair makemesi olıp keçti.
Apayı, onıñ oturışı vaqtında olğan alıntısını alıp ketire:
"Menim ögünde ep seçim peyda ola: ya dua etip bunıñ içün tahqiqat tevqifhanesinde cezasını çekmek, ya da dua etmeyip bunıñ içün Qıyamet künü cezasını almaq. Soñki sözümde "apishaneler, işançımıznı yoq etip olamazlar" dep ayttım. Öyle olğanını isbatlap olurım dep ümüt etem. Cemaat da müstemlekede olayatqanına diqqatını çekecegine de işanam. Riayet etmegenleri ise – din serbestligidir. Bu meseleni çezip azat tarzda dua etip oraza tutumağa ricasınen cemaat teşkilâtlarına muracaat etem. O, adiy qaidelerdir. Buna aqqımız bar", – dedi Remzi Bekirov makemede.
Makeme, qararnı qabul etti mi dep qadın qayd etmegen.
Remzi Bekirovnı 2019 senesi saban aynıñ 27 tutıp aldılar, 2022 senesi saban aynıñ 10 ise – Rostov-na-Donudaki makemesi onı qattı nizamlı müstemlekesine 19 yılğa makeme etken.
Qırımda prezident temsilciligi haber etkeni kibi, mabüsni bir qaç sefer qanunsız sürette baş kiyiminiñ yoq oluvı ya da "uymağan yerde" dua etilmesi kibi uydurılğan sebeplerden cezahanege yerleştire ediler. Netice olaraq, yarım yıl içinde o, tahqkikat tevqifhanesinde yedi kere bulunğan edi, orta küz ayında ise – Remzi Bekirovnı qattı şaraitlerge alıp keçirgenleri aqqında belli oldı. Ayrıca, oña tuvğanlarğa telefon etmege yasaq etken ediler.
Remzi Bekirov aqqında ne bilemiz
Remzi Bekirov — Qırım sakinlerine qarşı siyasiy sebepli davalarda tintüv ve makemelerniñ onlayn yayınlarını alıp barğan içtimaiy jurnalisttir. O, Qırımdaki siyasiy mabüslerniñ qorantalarına yardım etmek ğayesiniñ teşebbüsçisidir. Onıñ üç çağına yetmegen balası bar.
2019 senesi saban ayınıñ 27-nde Qırımda kütleviy tintüvler keçirildi. Taqiqat tedbirleri esasen qırımtatarlarnıñ yaşağanları Aqmescit civarındaki Bavurçı, Mamaq, Yañı Abdal köylerinde keçirildi. O vaqıt Rusiye FSBniñ hadimleri yigirmi insannı tuttılar. Daa üçü bir qaç kün içinde Rostov-na-Donu şeerinde tutuldı, üçü qıdıruvğa ilân etildi. Daa soñ bu iş üzerinde daa eki qırımtatar adamı tutuldı.
25 qırımtatar cemaat faalcisi "Hizb ut-Tahrir" islâm siyasiy firqasında iştirak etkeninde qabaatlandı. Apiske alınğanlarnıñ çoqusı "Qırım birdemligi" uquq qorçalayıcı birleşmesiniñ iştirakçileridir. Şaban Umerov, Remzi Bekirov, Riza İzetov ve Raim Ayvazov Rusiye Ceza qanunnamesiniñ 205.5 maddesiniñ 1-inci qısmına binaen terror teşkilâtınıñ faaliyetini teşkil etüvde qabaatlanalar.
2022 senesi saban ayınıñ 10-nda Rostov-na-Donudaki Cenübiy bölge arbiy makemesi, uquq qorçalayıcı Remzi Bekirovnı 19 senege maküm etti.
2024 senesi oraq ayında Bekirovnı Rusiyeniñ Krasnoyarsk vilâyetindeki 2. Yeniseysk apishanesinden çıqardılar. Bundan evel onı Qırımğa yaqın olğan Rusiye Federatsiyasınıñ Rostov vilâyetindeki müstemlekesine etap etmege red etken ediler. Adam tek maküm etilecek soñ etap yerine şikâyet etmek mümkün eken.
Qırım siyasiy mabüsi, 2024 senesi saban ayında müstemlekede bulunğan vaqıt apis cezasına qadar müddetini esapqa almağa tırıştı. Amma Bekirovnıñ davası baqılğan Çita şeeriniñ 2-nci Şarqiy bölge arbiy makemesi cevap yollamadı, ve müddetniñ ğayrıdan sayılması aqqında qararnı qabul etmedi. Bu sebepten qırımtatar apishanede belgilengen müddetten çoq tutuldı.
Telegram, WhatsApp ve Facebookta Suspilne Qırım haberlerine abune oluñız
