Avropa Parlamentiniñ azaları işğal etilgen 150 Qırım siyasiy mabüsine destek mektübini yollaycaq olalar. "Serbest Qırımğa mektüpler" teşebbüsi çerçivesinde aktsiyanı "Avropa Ukrainanıñ dostları" formal olmağan gruppasından beş Avropa mebusı teşkil etti.
"Qırım esnası" cemaat teşkilâtınen beraber Avropa parlamentiniñ mebuslarına mabüsler aqqında malümat bergen ZMINA insan aqları merkezi bunı bildirdi.
Ukrain siyasiy mabüslerine qol tutuv mektüpleri kiçik aynıñ 10-13 künleri Strasburgda keçirilgen Avropa parlamentiniñ toplaşuvında imzalandı.
O vaqıt Ukraina Yuqarı Şurasınıñ reisi Ruslan Stefançuk teşebbüs gruppasınen körüşti: Marketa Gregorova (Yeşiller/EFA, Çehiya), Pâtras Avştreviçüs (Yañılaştırılğan Avropa, Litvaniya), Andriy Kovaçev (YKP, Bulğaristan), Reynis Poznâk (EKR, Latviya) ve Tiys Royte.
Mektüp bile ayatnı qurtarıp ola. İlk baqışta bu, simvolik bir areket. Kerçekten de, mektüplerniñ tesiri bar. Olarnı alğan esirlerge daa yahşı yanaşalar, çünki Rusiye quvetçileri dünya olarnı nezaret etkenini bileler. Azatlıq içün canlarınen para bergenlerni unutmamalımız", — hep Avropa parlamentiniñ mebusı Marketa Gregorova ayttı.
O, bu sene 70 yaşını toldurğan Qırım sakini ve siyasiy mabüs Ğalına Dovğopolanıñ ikâyesini hatırlattı.
“O, Qırım işğaline qarşı çıqqanı ve ukrain göñüllileri ile bağ tutqanı içün Rusiye rejimi tarafından 12 yılğa apiske alındı. Şimdi onıñ ciddiy sağlıq meseleleri bar, ve işğalciler oña tedaviylenmege bermeyler. Bu deşetli şaraitte 12 yıllıq apis cezası onıñ içün ölüm cezası ola bile", — dep Marketa Gregorova ayttı.
Siyasiy mabüsler azaplanalar, olarğa tibbiy yardım kösterilmey, olarnıñ tuvğanları ve advokatları ile bağları kesilmek, olarnı izolâtsiya etmek ve yoq etmek içün apishanelerge alıp ketile. Bu sebepten mektüpler vastasınen olarnen bağ tutmaq pek müim, dep Avropa parlamentiniñ mebusı Piatras Auştreviçüs ("Yañı Avropa", Litvaniya) qayd etti.
“Yüzlernen Qırım sakini Rusiye boyunçığını tanımadığı içün apiske alındı. Biñlernen ukrain qorçalayıcıları er kün Rusiye GULAGlarında işkence ve insaniyetsiz şaraitke oğratıla. Men bu cesür insanlarğa ukrain milletiniñ ve devletiniñ azatlığı oğrunda küreşke sadıq olğanları içün teşekkür bildirmege ve olarğa qarşı yapılğan basqılarğa samimiy birdemlik bildirmege isteyim", — dep Pietras Avştreviçüs ayttı.
Avropa parlamentiniñ mebusı Andriy Kovaçev (ENP, Bulğaristan) bu mektüpler mabüsler içün ümüt çırağı ve Avropa parlamentiniñ azaları olarğa qol tutqanını ve Ukrainağa kerek olğanı qadar qol tutmağa devam etecegini hatırlatqanı emin olğanını qoştı.
"Avropa qıtasında cenkniñ deşetini toqtatmaq ümütinen Ukraina, onıñ kelecegine dair qararlar alınğanda muzakereler masasında bulunmalı, adaletli ve devamlı barışıq içün çalışqan Avropa Birligi kibi", — dep Andriy Kovaçev ayttı.
Ukraina prezidentiniñ Qırımdaki temsilciliginiñ malümatına köre, 218 Qırım siyasiy mabüs aqqında belli, olardan 133-ü —qırımtatardır.
Facebook, Instagram ve Telegramda haberlerimizni oquñız, bizim YouTubeve TikTokımıznı baqıñız
