İşğal etilgen Qırımda Keriç devlet deñiz tehnik universitetiniñ studentlerini arbiy cedvelge yazılmağa mecbur eteler. Bunı yapmağanlarğa stipendiyadan çıqarmaqtan qorqutalar..
Bunı Milliy muqavemet merkezi bildirdi.
Merkezniñ qayd etkenine köre, bu adım vaqtınca işğal etilgen topraqlarda gençlerni zorbalıqnen arbiyleştirmek içün daa bir ıntıluv ola ve halqara insan aqları qaidelerini boza.
"İşğal etilgen topraqlarda vatandaşlarnı arbiy hızmetke mecburen celp etüv, işğal etken devletniñ öz silâlı quvetlerinde hızmet etmesini yasaq etken Jenevre şartnamesine zıt kele. İşğalli akimiyetniñ böyle areketleri tek qanunsız degil, aynı zamanda ahlâqsızdır, çünki genç ealiniñ ayatı ve kelecegini telükege oğrata", — dep aytıla haberde.
Aynı zamanda, Qırımtatar maaliy merkezi, 2022 senesinde Qırım sakinleriniñ Ukrainağa qarşı cenkke qanunsız sürette celp etilmesini toqtatmaq maqsadınen "Mogilizatsiya" malümat kampaniyasını başlatqanını hatırlata. Qırım sakinlerine, askerlikke kütleviy çağıruv şeadetnamesini alğan, amma işğalcilerniñ ordusına ketmege niyeti olmağanlarğa ne yapmaq kerekligi aqqında malümat berile.
Telegram, WhatsApp ve Facebookta Suspilne Qırım haberlerine abune oluñız
