Yuliya Bunâknıñ qorantası 2023 senesi arman ayında Donetskte elâk olğan aqayı Yevheniy Osıpkovsız yaşamağa ögrene. Adam, tolu miqyaslı istilânıñ birinci künlerinden başlap, memleketini qorçalamağa başladı. Yevhenniñ arbiy tecribesi bar ve Rusiye ne yapa bilecegini bile edi, çünki 2015 ve 2016 seneleri devletni ATOTerroristke qarşı operatsiya zonasında qorçalağan edi.
Suspilne Qırım mühbirine Yuliya dedi ki, yarımada qorantası içün ekinci ev kibi oldı. Şimdi olar beraberlikte Qırım cenk bitecek soñ Ukraina terkibine qaytacağına işanalar.
Yuliya — Qırımdan, Keriçten, Yevheniy — Kıyivli. Olar iş yerinde — fast-food restoranında — tanış oldılar. Başta sadece ortaq gruppada dost oldılar. Qadın, olarnıñ munasebetleri nasıl daa büyük bi şeyge inkişaf etkenini hatırlay.
"O, 25 yaşına kirdi, gece nevbetinde edi. Biz onı hayırlamaq içün gece saat 12-de işke keldik. Ertesi künü biz onıñnen beraber parkta laf etmege kettik. Men onı çay içmege davet ettim. Kelecek 22 yıl devamında biz er vaqıt bergamotnen çay içe edik", — depYuliya Bunâk añlattı.
Yuliya 18 yaşına qadar Keriçte yaşadı, soñra Kıyivge köçti. Yehen içün de Qırım tuvğan bir yer oldı, amma Yuliyanen tanış olğanına qadar yarımadada iç bir vaqıt bulunmağan edi. Qadın aqayınıñ deñizni ilk körgenini hatırlay.
"Deñizge, yalığa kelip, suvğa doğru merdivenler bar eken, o, ellerini suvğa çekti ve tadını baqtı. Çünki onıñ ne olğanını bilmey edi. "O, kerçekten de tuzlu", dedi. Men buña pek şaşqan edim", — dep elâk olğan askerniñ apayı qayd etti.
Qarı-qoca er yıl Qırımğa bara edi. Lâkin 2014 senesi yarımada Rusiye tarafından işğal etildi.
"Bu olğan soñ, men şimdi bile öz duyğularımnı hatırlayım. Men evimniñ aşhanesinde turıp, televizor seyir etip, ağlay edim. Soñki sefer o, Qırımğa 2014 senesi barğan edi, bundan soñ anda barmadı", — dep Yuliya tarif etti.
2015 senesi Yevheniy memleketini qorçalamağa ketti, Şarqta cenkleşken edi. Yuliya dedi ki, o vaqıt o, Qırımnıñ azat etilecegine inana edi.
"Onıñ içün Qırım ev edi. O, anda küçüni toplay edi. 15 yaşında ATOğa kirgende, bu onıñ fikri edi. O, yarımadanı Ukraina terkibine qaytarmağa yardım etecegine inana edi", — dep qadın hatırladı.
Adam bir buçuq yıl askerlikte hızmet etti, soñra vatandaşlıqqa qayttı. 2022 senesi Rusiye Ukrainağa tolu miqyaslı istilâ etip başladı.
"Kiçik aynıñ 23 künü aqşam arbiy bölükten oña telefon etip: "Yarın saat 9:00-da eşyalarnen kel", — dediler. Bir şeyler yañlış olğanını añladıq. Az yatıp, şefaq olğanı kibi qarşıladıq: boz kök, uçaqlarnıñ gürültüsi ve bir de bir qorqunç añlayış", — dep Yuliya ayttı.
Yevheniy, Ğennadiy Vorobyov adına Baş ştabnıñ 101 ayrı qorçalav brigadasında hızmet ete edi. Oraq ayınıñ 23-nde Donetskte adam yaralandı, onı hastahanege qoydılar. Oña 10 künlik tatil berildi, amma o, mevamında qaldı. 2023 senesi arman ayınıñ 3-nde Yevhen elâk oldı.
"Aslında, men inanmadım. Künlerniñ soñunda maña onı öldürgenlerini tasdıqladılar. Sanki yüregim bütün evni uyandıracaq kibi edi, çünki o, vucumdan sanki çıqa edi. Ertesi künü, saba, yanımdaki hastahaneniñ qapısında turdım ve birden ayttım ki, aqayım elâk oldı, ve men yardımğa muhtacım. Men bunı özüm yapıp olamağanımnı añladım", — dep qadın hatırladı.
Yuliya hastahaneden qaytqan soñ, oğluna babası ğayıp olğanını bildirdi.
"Onı oturtıp, babasınıñ elâk olğanını ayttım. O da: "Yoq, bu olamaz", dep ayttı. Men onı quçaqladım ve ayttım ki, ağlamaq isteseñ, ağla, çünki bu kerçek. Endi babası bizni kökten qorçalay", — dep Yuliya Bunâk ayttı.
Oğlan şimdi 14 yaşında, ve o da babası aqqında hatıralarınen paylaşa.
"O pek yahşı bir insandır. O yahşı aşçı edi, pek mesüliyetli edi. Elbette, men onı çoq özleyim. O, vatanını qorçalamaq içün canını feda etti. Çünki şimdi er kes cenkke barıp olamay", — dep Yuliya ve Yevheniynıñ oğlu Timofiy Osıpkov ayttı.
Yuliya dedi ki, o ve oğlu aqayı istegen kibi yaşaylar. Seyaat eteler, cebege yardım toplaylar. Bundan da ğayrı, qadın Yevheniyniñ hatırasını añuv aqqında tarif etti.
"Men onıñ birinci sefer cenkke ketkeni, ekinci kere ketkeni ve qalqan üzerinde qaytqanı evniñ üstünde hatıra tahtası olmaq kerek olğanını bilem. Bu, hatıra içün yapqan adımlarımdan biridir", — dep elâk olğan arbiy Yevgen Osıpkovnıñ apayı qayd etti.
Qadın işğal etilgen Qırımğa soñki sefer 2019 senesi ana-babasınıñ altın toyuna barğan edi. Yarımada azat etilecek soñ yapacaq planları bar, dep ayttı.
"Men Jenânıñ mezarına ketecegim. Ve bu yapılğanını aytacağım. O yerge aqiqat er vaqıt kerçekleşecegini ve bir şeyni alıp ketmege mümkün olmağanını aytmaq içün baracağım. Bundan da ğayrı, Azaq deñizinde yuvunacağım", — dep Yuliya Bunâk yekünledi.
Telegram, WhatsApp ve Facebookta Suspilne Qırım haberlerine abune oluñız
