Rostov-na-Donudaki Cenübiy arbiy bölge makemesinde "Hizb ut-Tahrir davasında" altıncı Bağçasaray gruppasındaki iştirakçilerine dair oturışında prokuror, qabaatlavınıñ bir qaç şaatınıñ sorğusından vazgeçti. Olarnıñ arasında FTH-niñ hadimleri ve şaatlar.
Bunıñ aqqında advokat Emil Kürbedinov bildirdi, yaza "Qırım birdemligi".
İmayeciniñ sözlerine köre, oturışta prokuror, dava malümatlarnı, ayrıca tintüvlerniñ protokollarnı ve imaye astında olğanlarınıñ qayd etilgen muzakerelerniñ stenogrammalarını oquğan. Amma bundan soñ şaatlarnıñ yarısını sorğuğa çekmege keregi yoq dep bildirdi.
"Qabaatlav tarafı, şaatlarnıñ yarısınıñ sorğusını öz içün maqsatqa uymağanı kibi sayıp bu devirde sorğudan vazgeçti", – bildirdi Kürbedinov.
Evelden davada "gizli şaatlarnıñ" sorğuları olıp keçken, olarnıñ şaatlığı qabaatlavınıñ esas isbatlarından biri ola.
Aynı oturışında imaye astında olğanları olarğa tahqiqat tevqifhanesinden telefon etmege izin bermege talabınen şefaatnı alıp bergenler. İşğal makemesi, bu meseleni baqmağa söz bergen, amma iç bir qararını daa qabul etmegen. Bu davadaki kelecek oturışı, uvut aynıñ 24-ne planlaştırılğan.
"Hizb ut-Tahrir davası"nıñ altıncı Bağçasaray gruppasınıñ mabüsleri aqqında ne bilemiz
Saban ayınıñ 5-nde saba maalinde Bağçasaray ve Canköy rayonlarında uquq qorçalayıcılar 10 qırımtatarnıñ evinde tintüv keçirdiler. Aynı o künü makeme olardan dörtü - qırımtatar faalcileri Memet Lümanov, Aziz Azizov, Rustem Osmanov ve Mustafa Abduramanov içün tevqif tedbirini sayladı. Olarnı SİZOğa yolladılar.
Daa soñra makeme Canköy ve Canköy rayonınıñ tutulğan sakinlerini SİZOğa yolladı: Enver Halillayev, Nariman Ametov, Ali Mamutov, Cadra köy camisiniñ imamı Vahid Mustafayev ve Arsen Kaşka.
Sabıq imam Remzi Kurtnezirovnıñ hastalıqları sebebinden ev apsine alındı. Tutulğan on kişiniñ episi Rusiyede yasaq etilgen Hizb ut-Tahrir islâm firqasınıñ iştirakçisi ola. Tutulğanlarnıñ çoqusı, çoq balalı qorantalarnıñ babaları ola.
Hizb ut-Tahrir – islam siyasiy fırqası. 2003 senesi Rusiyede onı terroristik teşkiyatı kibi tanıdılar, oña ait olğanlarını ise taqip etmege başladılar. İştirakçılarnı "qabarcılıqqa qarşı faaliyetinde" ve "dünyaara hilâfet" degenini teşkil etmege ıntıluvında qabaatlaylar. 2014 senesi Qırımnıñ işğalinden soñ işğalciler zapt etilgen Qırımğa öz qanunnamesiniñ areketini tarqattılar. Böyleliknen, yarımadanıñ işğalinen razı olmaması içün qırımtatarlarına basqısını quvetleştirip, Hizb ut-Tahrir-ge alâqasında qırım musulmanlarnı da qabaatlamağa başladılar.
Telegram, WhatsApp ve Facebookta Suspilne Qırım haberlerine abune oluñız
