Vaqtınca işğal etilgen Qırım sakinine Rusiye ordusına yardım etkeninde şübe bildirdiler. O, Zaporijjâ, Herson ve Ukrainanıñ başqa vilâyetlerinde cenkleşken Rusiye arbiylerine para toplav ve yardımnı teşkil ete edi. Duşmannen işdeşlik yapqan qadın şahsen işğalcilerge ilâc, aşayt, urba ve atta arbiy donatmalarnı, şu cümleden ratsiya ve gece közlüklerini berdi.
Şübe malümatına atıf eterek, Jurnalist taqiqatları merkezi bunı bildirdi.
Ukraina havfsızlıq hızmetiniñ taqiqatçıları, Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) sakininiñ işğalli akimiyetke faal şekilde yardım etkenini, Rusiyege qoltutqan teşkilâtlarnen işbirlik yapqanını ve işğalcilerge resurslar temin etkenini belgilediler.
Hususan, 2024 senesi mayıs ayında o, Rusiye Silâlı quvetleriniñ 1153-ünci polkunıñ tibbiy şirketiniñ arbiy hızmetçilerine tibbiy vastalar berdi, em de Sudaq şeerinde yaralanğan işğalcilerge yardım topladı.
2024 senesi saban-çiçek aylarında Simferopolda (Aqmescitte) yaralanğan işğalcilerge şahsen ilâc ve gigiyena vastalarını berdi. O vaqıt o, vaqtınca işğal etilgen Alçevsk ve sözde "LNR"deki Rusiye arbiyleri içün yardımnıñ ketirilmesini teşkil etti.
O, Rusiye mahsus vazifeler bölüklerine de qol tuta edi. 2024 senesi saban ayında o, Zaporijjâ yönelişinde cenkleşken 81-inci ayrı "Ayuvlar" brigadasına resurslarnı bere edi, em de Herson vilâyetiniñ işğal etilgen qısmına barıp, işğalcilerge aşayt, ilâc, urba ve donatmalarnı bere edi.
Öz faaliyeti içün duşmanğa yardımcı işğalli akimiyet ve Rusiye teşviqat fondlarından defalarca mukâfat aldı. Hususan, onı "Meramet ve gumanitar yardım içün" nişanınen taqdirlediler, em de Ukrainağa qarşı cenk iştirakçilerine qol tutqan teşkilâtlardan teşekkürname aldı.
UHH duşmannen işdeşlik yapqan qadınğa Ukraina Cinayet qanunnamesiniñ 111-2-nci maddesine binaen - istilâcı devletke yardım etüvde şübeli sayılğanını bildirdi. O, 12 yılğa qadar azatlıqtan marum etüv cezası ve mülkiyetiniñ musadere etilmesi üküm etile bilir.
Telegram, WhatsApp ve Facebookta Suspilne Qırım haberlerine abune oluñız
