Qırım siyasiy mabüsi Appaz Kurtamet Pskov vilâyetindeki sert rejimli müstemlekede buluna, anda onı ağır işke mecbur eteler, işten soñ ise oña yatmağa bile yasaq eteler.
Bunı onıñ anası Ayşe Kurtamet bildirdi, dep Qırımtatar maaliy merkezi yazdı.
Onıñ aytqanına köre, ağır iş künlerinden soñ mabüslerge yataqqa oturmağa ve raatlanmağa bile izin berilmey. Appaz bunı yapmaq ıntıluvı içün endi bir maruza aldı.
"Ücretsiz çalışmaq içün, adamğa gece saat 22:00-gece ayaqlarını açmağa ruhset berilmey, saat 6:00-da ise işke ketmek mecbur. Bu XXI-nci asır, anda zorbalıq yoq deyler?!" — dep Ayşe Kurtamet yazdı.
Onıñ qayd etkenine köre, bu şartlar — müstemleke memuriyetiniñ öz-özüni idare etüvi degil de, Rusiye Federatsiyasınıñ qanunlarında yazılğan. Rusiyeniñ apishaneler sisteması, mabüslerni qulğa çevirgen mecburiy iş sayesinde çalışa.
Ayşe Kurtamet, yalıñız muracaatlarnı diñlegen, lâkin semereli areket etmegen halqara teşkilâtlarnıñ işinen raatsızlanğanını bildirdi.
Appaz Kurtamet aqqında ne bilemiz
2022 senesi oraq ayınıñ 23. künü Appaz Kurtamet Novooleksiyivka qasabasından Qırımğa aqrabalarına ketti. “Çonğar” KÇKNda aqrabalarınen bağını coydı.
Birazdan belli oldı ki, RF Cinaiy qanunamesiniñ 208. maddesiniñ 1. qısmına binaen Appaznı terror teşkilâtına para bermege qabaatlağan rus quvetçileri oğlannı tuttılar. Taqiqatçılarnıñ sözlerine köre Appaz, "Noman Çelebicihan adına batalyon"da hızmet etken tanışına borc 500 grivna berdi.
Qırımtatar Maaliy Merkezi haber berdi ki, bu "dava"da qabaat, "gizlengen şaatlar"nıñ sözlerine ve rus quvetçilerinen faalca çalışqan böyle degen "mütehassıslar"nıñ neticesine esaslana. Davanen bağlı oturışlar, halqara uquq qaidelerini ciddiy şekilde bozdı, dep Merkez belley.
Umumen belli oldı ki, işğalli makeme Kurtamet içün 10 senelik üküm soradı.
2023 senesi çiçek ayınıñ 20. künü RF tarafından teşkil etilgen Aqmescit makemesi Appaz Kurtametni ukrain göñülli batalyonına para bermege qalaatlap, yedi senege maküm etti.
Telegram, WhatsApp ve Facebookta Suspilne Qırım haberlerine abune oluñız
