Ukraina makemesi Qırım MCniñ Sudaq ve Keriç şeer makemeleriniñ eki sabıq makemecisini devlet hainligiUkraina CQniñ 111-nci maddesiniñ 1-nci qısmı içün 12 yıl apis cezasına maküm etip, mülküni almağa qarar aldı.
Kiçik aynıñ 10-nda Qırım Muhtar Cumhuriyeti ve Sevastopol (Aqyar) şeeriniñ prokurorlığı bu aqqında haber berdi.
Qırım işğal etilgen soñ, eki makemeci de Ukraina halqına sadıqlıq antını bozıp, istilâcı Rusiye devletine hızmetke keçti. Olardan biri "Sudaq şeer makemesiniñ reisiniñ muavini", başqası ise "Keriç şeer makemesiniñ makemecisi" oldı.
"İstilâcı devletniñ adından ve menfaatları içün "adalet" yerine ketirerek, maküm etilgenler yarımadada işğalli makeme organlarınıñ çalışmasını temin ettiler, em de Rusiye Federatsiyasınıñ vekillerine Ukrainağa qarşı bozuv faaliyetini alıp barmaqta yardım ettiler", — dep aytıla haberde.
Qırım MC ve Aqyar şeeriniñ prokurorlığı Suspilne Qırımğa añlattı ki, qabatalanğan adam olmadan mahsus makeme oturışları ("ğıyabiy ükümler") neticesinde çıqarılğan ükümler umumiy şekilde aqqını qazanalar. Yani apellâtsiya şikâyetnamesi berilmese, apellâtsiya şikâyetnamesini berüv müddeti (üküm çıqarılğan 30 kün soñ) bitecek soñ aqqını qazanır.
Apellâtsiya şikâyetnamesi berilse ve lâğu etilmese, apellâtsiya makemesi qarar alacaq soñ üküm aqqını qazana. Aynı zamanda adam tutulğan vaqıttan berli ceza müddeti başlap sayıla.
Telegram, WhatsApp ve Facebookta Suspilne Qırım haberlerine abune oluñız
