Qırımnıñ işğali başlağan soñ Ukraina uquq qorçalayıcı organları yarımadada qanunsız tutuv ve tintüvler sebebinden 300-den çoq cinaiy davanı tahqiq etti.
Qırım Muhtar Cumhuriyeti ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeriniñ prokurorlığı Suspilne Qırımnıñ sorğusına bergen cevabında böyle malümat qayd etildi.
Müessiseniñ malümatına köre, tutulğan ve evi tintilgen adamlarnıñ çoqusı — qırımtatarlardır.
İşğalli quvetlerniñ areketleri Ukraina Cinayet qanunnamesiniñ 146-ncı (qanunsız azatlıqtan marum etüv) ve 162-nci (qanunsız tintüv) maddelerine binaen belgilene.
Bundan ğayrı, ukrain uquq qorçalayıcıları Qırım sakinleriniñ qanunsız apis etilmesinen bağlı Ukraina Cinayet qanunnamesiniñ 438-inci maddesine istinaden 112 dava açtılar.
Şimdilik makemege işğalli uquq qorçalayıcı organlarnıñ vekillerine qarşı beş qabaatlav aktı ve Qırım sakinleriniñ taqip etilmesinde iştirak etken "makemeciler", "prokurorlar" ve diger memurlarğa qarşı 13 akt yollanıldı.
Muhtariyet prokurorlığı, Rusiye halqara gumanitar uquqnı, şu cümleden Rusiye ordusında mecburiy hızmetni yasaq etken Jeneva şartnamesiniñ 51-inci maddesini muntazam sürette boza, dep qayd etti.
2014 senesinden başlap Qırımda Rusiye Silâlı quvetleriniñ saflarına mecburen ya da basqı altında 34 biñden çoq vatandaş celp etildi.
"İşğalli devlet repressiyalarnı qorquzuv aleti olaraq qullana. Er bir faktnı qayd etemiz ve Ukraina vatandaşlarına qarşı cinayetlerde iştirak etkenlerniñ mesuliyetke çekilmesi içün çalışamız", — dep QMC prokurorlığınıñ cevabında bildirildi.
Taqiqat devam ete. Ukraina halqara makemeler içün delil toplamağa devam ete, em de Rusiye taqiplerinden zarar körgen yarımada sakinlerine destek köstere, dep prokurorlıq qoştı.
Telegram, WhatsApp ve Facebookta Suspilne Qırım haberlerine abune oluñız
