17 yılğa maküm etilgen kör siyasiy mabüs Oleksandr Sizikovnı Qırımdan 5,5 biñ kilometr uzaqlıqta bulunğan Rusiye Federatsiyasınıñ Krasnoyarsk vilâyetindeki Yeniseysk şeeriniñ apishanesine etap eteler.
O, advokatına yazğan mektübinde bunı bildirdi, dep Qırım birdemligi yazdı.
Sizikovnıñ aytqanına köre, qara qış ayınıñ 22-nde Novosibirsk şeerine keldi. O, qara qış ayınıñ 28-nde Yeniseysk apishanesinde bulunacaq, dep haber etildi.
Oleksandr Sizikov 2009 senesi yol qazasından soñ bütünley kör oldı. Daa bir qaza neticesinde onıñ da talağı çıqarıldı. Onıñ muddetsiz I-nci gruppa körme saqatlığı, em de aşqazan ve boyun-belkemik bölüginiñ hronik hastalıqları bar, onıñ içün muntazam sürette masaj, mütehassıslarnıñ közetüvi ve reabilitatsiya kurslarına ihtiyacı bar. Onıñ anası, Olena Sizikova, apiske alınması sağlığınıñ kerginleşmesine ketire bilecegini defalarca Qırım birdemligine bildirdi.
"Hizb ut-Tahrir davası"nıñ dörtünci Bağçasaray gruppası aqqında ne bilemiz
2020 senesi oraq ayınıñ 7-nde Qırımda keçirilgen kütleviy tintüvler vaqtında yedi kişi tutuldı. Aqmescitniñ "Kıyiv rayon makemesi" altı mabüs içün tevqif tedbirini sayladı.
İsmet İbrahimov, Zekirya Muratov, Vadim Bektemirov, Emil Ziyadinov, Alim Sufyanov, Seyran Hayredinov "makeme" zalında apiske alındı ve Aqmescitteki taqiqat izolâtorına yerleştirildi. Birinci gruppa körme saqatlığına saip olğan Oleksandr Sizikov ev apsine alındı.
Tutulğanlarnıñ episi, Rusiyede terroristik olaraq tanınğan, amma dünyanıñ çoq ülkesiniñ milliy seviyesinde sıñırsız faaliyet etken "Hizb ut-Tahrir" islâm siyasiy firqasında iştirak etkeninde qabaatlanalar.
2023 senesi qara ayında "devlet prokurorı" "Hizb ut-Tahrir" davası çerçivesinde Cenübiy bölge arbiy makemesinde Oleksandr Sizikov içün 18 sene rica etti.
2023 senesi mayısnıñ 17-nde Rusiye Federatsiyasınıñ Cenübiy bölge arbiy makemesinde Oleksandr Sizikovnı 17 senege azatlıqtan marum etüv cezasına maküm ettiler. Alim Sufyanov ve Seyran Hayderinov 12 sene sert rejimli müstemlekege üküm etildi. Birinci dört senesini olar da apishanede keçirecekler.
Rusiye makemesi Sizikovnı sert rejimli apishanege yolladı ve apishaneden soñ daa bir buçuq senege azatlıqtan marum qaldırdı, oña cemaat tedbirleri ve toplaşuvlarğa barmamağa emir etti.
2024 senesi berim ayında Moskva vilâyetiniñ istinaf makemesi "Hizb ut-Tahrir davası"nıñ dörtünci Bağçasaray gruppasına qarşı şikâyet arizasını baqmağa devam etti. Onıñ iştirakçileri Alim Sufyanov, Seyran Hayredinov ve körme qabiliyetini coyğan saqatlı qırımtatar Oleksandr Sizikovdır. Olar tintüvler ve "makeme taqiqatı" vaqtında yapılğan bir sıra bozuvlarnı qayd ettiler.
Telegram, WhatsApp ve Facebookta Suspilne Qırım haberlerine abune oluñız
