Lüksemburg mebusları palatası Rusiye tarafından işğal etilgen Qırımda qırımtatarlarnıñ aqları bozulğanını takbih etken rezolütsiyanı qabul etti.
Öz Facebook saifesinde Ukraina Yuqarı Şurasınıñ reisi Ruslan Stefançuk bu aqqında haber etti.
"Vesiqada tarihiy repressiyalar, şu cümleden 1944 senesiniñ sürgünligi ve zemaneviy basqılar: Meclis yasağı, qırımtatar tili ve medeniyetiniñ sıñırlavı, kütleviy apis etüv ve tintüvler aydınlatıla. Bu cinayetlerniñ tanılması — adaletke ve qabaatlılarnıñ mesüliyetke çekilmesine doğru müim bir adımdır", — dep Stefançuk yazdı.
Onıñ aytqanına köre, bu qarar Lüksemburgnıñ Ukrainanıñ serbestligi, suvereniteti ve Avropa qıymetleri oğrunda küreşinde deñişmegen destegini ifadeley.
Qara qış ayınıñ 22-nde Avropa parlamenti Rusiyeniñ Ukrainadaki cenkni aqlamaq içün dezinformatsiyanı qullanğanını takbih etti. Bu vesiqa içün 480 mebus rey berdi, 58 qarşı çıqtı ve 48 — bitaraf qaldı, dep Avropa parlamentiniñ saytında bildirildi.
"Avropa parlamenti sovet terrorı fedalarınıñ hatırasını, hususan Holodomor, Gulag sisteması ve qırımtatar tamır halqınıñ sürgünligi faciası añmağa çağırdı", — dep Telegramda Ukraina prezidentiniñ Qırımdaki temsilciligi bildirdi.
Hatırlatamız ki, 2024 senesi ilk qış ayınıñ 19-nda Avropa parlamenti, bütün Qırım siyasiy mabüsleriniñ deral azat etilmesini, olarğa tibbiy yardım berilmesini ve qorantalar, advokatlar ve halqara subyektlernen bağlanmağa imkân berilmesini talap etken qararda muracaat etti.
Telegram, WhatsApp та Facebookta Suspilne Qırım haberlerine abune oluñız
