Başqırtistannıñ 2-nci tüzetüv müstemlekesinde ceza çekken musulman mabüslerinden Quran-ı Kerimniñ arap tilinde bütün nushasını almağa başladılar.
Siyasiy mabüs Vadım Siruk "Zonatelekom" mahsus bağ vastasınen ömür arqadaşı Ğanna Boğaçovağa bunı ayttı, dep "Qırım birdemligi" haber etti.
Siyasiy mabüsniñ aytqanına köre, nezaretçiler öz areketlerini arap tilindeki Quranlar "reberlikniñ emirlerinen yasaq etilgeni"ne esaslanıp añlattılar. Vadım Siruknıñ de, kitap teşkerilgenine ve bütün kerekli müürler qoyulğanına baqmadan, Quranı alındı.
Advokat Emil Kurbedinov Rusiye müstemlekesine muracaat etip, musulmanlardan Quran ne içün alınğanını añlatmağa talap etti, çünki bu kitap yasaq etilgen aşırıcılıq edebiyatı cedveline kirmey.
"Bu kitap, olar içün zor vaqıtlarnı yaşamağa yardım ete. O, musulmannı er şeyniñ sebebini añlata ve ruhlandıra. Men bellesem, memuriyet de bunı bile. Belki de, böyle areketlerniñ sebebi bu boşluqta buluna. Resmiy cevaplarnı bekleymiz", — dep "Qırım birdemligi" advokatnıñ aytqanlarını bildirdi.
Salavatta bulunğan başqa siyasiy mabüs Teymur Abdullayev de musulmanlarnıñ Quran saqlavını sıñırlağanları aqqında haber etti. Oña ceza izolâtorına Quran ketirmek yasaq etildi. Altı ay evelsi o ve başqa mabüsler Rusiye prokurolığına muracaat ettiler. Prokurorlıq, Qurannı ŞİZOğa ketirmek yasağı qanunsız olğanını ayttı.
Telegram, WhatsApp ve Facebookta Suspilne Qırım haberlerine abune oluñız
