2024 senesi işğal etilgen Qırımda 111 tevqif, 61 tintüv, 173 apis ve 109 sorğu qayd etildi. Umumen bir yılda 1,5 million ruble (650 729 ğrıvnâ) para cezaları berildi.
Qırımtatar Maaliy Merkeziniñ temsilcileri 2024 senesi işğal etilgen Qırımda insan aqlarınıñ bozuluvı taliline bağışlanğan matbuat konferentsiyasında bunı bildirdiler.
2024 senesiniñ esas malümatları:
- 111 kişi tutuldı, 28-i qırımtatar.
- 61 tintüv, 35-i — qırımtatarlarnıñ evlerinde.
- 173 adam apiske alındı, olardan 75-i tamır halqınıñ vekilleri oldı.
- 109 adam sorğuğa çekildi, olardan 35-i — qırımtatar.
- Adaletli makeme aqqı 281 kere bozuldı, 156-sı — qırımtatarlarğa nisbeten.
- Eñ az 64 sağlıq aqqı bozuluvı qayd etildi, 56-sı — qırımtatarlarğa nisbeten.
- Yıl devamında para cezalarınıñ umumiy miqdarı 1 581 500 ruble (650 729 ğrıvnâ) oldı.
Qırımtatar Maaliy Merkeziniñ vekilleri işğal etilgen Qırımda keçken sene yapılğan tevqiflerniñ misallerini ketirdiler:
- Eki yıl şartlı olaraq Oleksandr Türenko "Rusiye Federatsiyasınıñ arbiy şan-şüret timsallerini aqaretlegeni" içün berildi.
- 12 yıl Keriç sakini "diversiya azırlağanı"nda qabaatlandı.
- Eki buçuq yıl — Yevhen Şved "nazizmniñ reabilitatsiyası" içün.
- 7 yıl — Canköy sakini, "UHHniñ vazifesi boyunca bomba saqlağanı içün".
- 2 yıl mecburiy işler — Maksım Zinçenko, "Yehova şaatları" davasınıñ mabüsi.
- Müstemleke-meskünde 1 yıl — qırımtatar Dlâver Salimov.
"Bir taraftan, insanlarnıñ faalligi azlaşqanını köremiz, çünki apiske alınğan erkeklerge birinciden movilizatsiya vesiqaları berildi. Başqa taraftan, insanlarnı qorquzıp, öz vatandaşlarına qol tutmamağa mecbur etmege tırışalar. Rusiye Silâlı quvetleriniñ itibarını tüşürgenleri içün tutulğanlar kütleviy ola — yılda 24 adise", — dep Qırımtatar Maaliy Merkeziniñ idare reisi Eskender Bariiev bildirdi.
Bariiev, Noman Çelebicihan batalyonınen alâqalar sebebinden tutulğanlarnıñ sayısı eksilgenini qayd etti, çünki olarnı Herson vilâyetine, hususan Geniçesk rayonına avuştırğanlar.
Telegram, WhatsApp ve Facebookta Suspilne Qırım haberlerine abune oluñız
