İşğal etilgen Qırımda Qırımtatar milliy areketiniñ veteranı, SSCB devriniñ siyasiy mabüsi, Qırımtatar Milliy Qurultay delegatı Arsen Alçıkov 84 yaşında vefat etti.
Facebook saifesinde Qırımtatar Milliy Meclisiniñ reisi Refat Çubarov bunı bildirdi.
Arsen Alçıkov qara qış ayınıñ 12-nde işğal etilgen Qırımda vefat etti. 2014 senesi kiçik ayda Qırım Rusiye ordusı tarafından işğal etilgen soñ, adam Ukrainağa sadıq qaldı.
Arsen Alçıkov aqqında ne bilemiz
1941 senesi Qırım Muhtar Sotsialist Şuralar Cumhuriyetiniñ Aluşta rayonınıñ Şuma köyünde doğdı. Üç yaşında ailesinen beraber Qırımdan sürgün etildi. Daa soñra tehnik-konstruktor zenaatını aldı, daa yaş olğanda Qırımtatar milliy areketiniñ iştirakçilerine qoşuldı. KezlevRusiye imperiyası ve Soviet Birligi tarafından Qırımnıñ meskün yerleriniñ adlarını deñiştirüv islâatından evelki ad/Yevpatoriyada doğğan ve Qırımtatar milliy areketiniñ faal iştirakçisi olğan ömür arqadaşı Tamara Kontuganskanen beraber 1967 senesi boş-ilk qış aylarında Taşkentte olıp keçken "on ekisiniñ davası" boyunca maküm etildi. Sovet lagerleriniñ mabüsi.
1975 senesi, qırımtatarlar içün vatanğa qaytmaq ıntıluvları akimiyet tarafından sert bir şekilde cezalandırılğanda, Arsen qorantasınen beraber Qırımğa qayttı, anda repressiyalar ve taqiplerge oğradı.
"Qırımtatar halqınıñ vatanına qaytması ve qırımtatar muhtariyetiniñ ğayrıdan tiklenmesi içün küreşiniñ bütün yıllarında Arsen milliy areketniñ eñ faal iştirakçileri arasında edi. Sovetler Birliginiñ dağılması ve mustaqil Ukraina devletiniñ meydanğa ketirilmesinen bir olğan qırımtatar halqınıñ vatanına kütleviy şekilde qaytması yıllarında Arsen Alçıkov qırımtatar gençleriniñ itibarlı reberlerinden biri oldı, olar biñlernen milliy areketniñ saflarına qoşuldı", — dep tarif etti Refat Çubarov.
Telegram, WhatsApp ve Facebookta Suspilne Qırım haberlerine abune oluñız
