Mudafaa quvetleriniñ Qara deñizde "Boyko qulleleri"ne ücüm etken soñ, devlet hainliginde qabaatlanğan sabıq halq mebusı Viktor Medvedçuknen bağlı "Novıye proektı" şirketi gaz çıqarıp olamadı. Şirket, "Çernomorneftegaz"nen davalar sebebinden qazma masraflarını qaytarmağa tırışa, amma bir davanı ğayıp etti.
Radio Svobodanıñ "Shemalar" leyhasınıñ jurnalistleri, Moskvanıñ Doquzıncı arbitraj istinaf makemesiniñ 2024 senesi ilk qış ayınıñ 23-nde çıqarğan qararına esaslanıp bunı bildirdi.
Qayd etilgenine köre, dava çerçivesinde şirket, işğalcilerniñ Qırım işğalinden soñ Simferopolda (AqmescittRusiye imperiyası ve Soviet Birligi tarafından Qırımnıñ meskün yerleriniñ adlarını deñiştirüv islâatından evelki ad) qayd etkenleri ukrain "Çornomornaftogaz" şirketiniñ "klonı" olğan Rusiyeniñ "Çernomorneftegaz" şirketinden "sebepsiz zenginleştirüv" olaraq 69,8 million ruble almağa talap etti.
"Novıye proektı" 2021 senesi "Çernomorneftegaz" şirketine zapt etilgen "Ğlıboka" ukrain yatağında quyu qazması içün 70,2 million ruble avans ödegenini iddia ete. Lâkin işler başlamadı: 2021 senesi arman ayında Rusiye Qaradeñiz flotunıñ komandanlığı "intensiv arbiy azırlıq" sebebinden qazma işini başqa tarihqa keçirdi. Yañı müddetler 2022-2023 seneleri içün belgilendi, lâkin amelge keçirilmesi öyle de olmadı.
2022 senesi arman ayında arbiy areketler vaqtında Rusiye tarafından zapt etilgen "Boyko qulleleri" Ukraina Silâlı quvetleriniñ ücüminden zarar kördi. Bu, Medvedçuknıñ qorantasınen bağlı olğan "Novıye proektı" şirketiniñ iştirakinen gaz çıqarılmasınıñ başlanuvında keçiktirüvlerniñ sebebi oldı. Şu anda şirket "Çernomorneftegaz"nen qazma işlerine masraf etilgen paralarnıñ bir qısmını qaytarmaq içün dava aça, lâkin soñki makeme esnasında olar muvafaqiyetli olmadılar.
"Boyko qulleleri"niñ azat etilmesi aqqında ne bilemiz
Berim ayınıñ 11. künü Baş istihbarat idaresi haber berdi ki, Ukraina "Boyko qulleleri"ni — 2014 senesinden berli işğal astında olğan ve Rusiye tarafından tolu miyaslı tecavuzdan berli arbiy maqsatnen qullanılğan Qırım yalısı yanında Qara deñizdeki burğu gaz ve yermay çıqarıcı platformalarını öz kontrolına qaytardı.
Nezaret altına "Petro Ğodovalets" ve "Ukraina" qazma platformaları, em de "Tavrida" ve "Sivaş" öz-özüni kötergen qazma qurulışları qaytarıldı. Operatsiya vaqtında mahsus hızmetçiler Qara deñizde gemilerniñ areketini taqip ete bilgen "Neva" radiolokatsiya stantsiyasını tutıp aldılar.
Baş istihbarat idaresiniñ bilgilerine köre, öz operatsiyası vaqtında mahsus quvetçiler qıymetli ğanimetlerni aldılar. Şu cümleden, yolbaşçılıq yapılmaz uçaq raketaları türlü vertolöt silâsını ve Qara deñizde gemilerniñ ketmelerini nezaret etken "Neva" RLSnı aldılar.
Telegram, WhatsApp ve Facebookta Suspilne Qırım haberlerine abune oluñız
