Qara deñizde eki Rusiye tankeriniñ qazası, Cenübiy Qırımnıñ yalılarına yetken büyük mazut tökülmesiniñ sebebi oldı. Bu, ekologiya felâketiniñ başlanğıcısıdır, çünki ava daa sıcaq olacaq vaqıt kirlenüv miqyası artacaq.
Bunı Bütünukrain ekologik ligasınıñ reisi Tetâna Tımoçko "Suspilne. Studiya"nıñ canlı yayınıdna qara qış ayınıñ 2-nde bildirdi.
"Suvuq suvda mazut tübüne otura, amma ava sıcaq olacaq vaqıt o, erip, ekinci kirlenüvge yol açar. O, deñizniñ terenliklerinde yaşağan canlılarnı yoq etip, yalı kenarınıñ büyük qısımlarını qaplap alacaq", — dep añlattı Tımoçko.
Ekolog şunı da qayd etti ki, mazut deñiz quşları içün telüke teşkil ete, olarnıñ çoqusı tüyleri temizlenmegeni içün elâk oldı.
Ukraina, yalı boyunıñ büyük bir qısmını zapt etkeni içün aqibetlerniñ yoq etilmesinde iştirak etip olamay. Rusiye ise, bu meseleni bütünley çezmeycek eski usullarnı, hususan mazutnıñ fizikiy toplanuvını qullana.
"Rusiye şimdi kerekli tedbirlerni almasa, yaz kelecek vaqıt kirlenüv seviyesi kritik olacaq. Qara deñizniñ kirlenüvi ekologiya sistemasına zarar ketirecek", — dep qoştı mütehassıs.
Ekologlar halqara toplulıqnı, hususan Qara deñiz bölgesiniñ memleketlerini, Rusiyeniñ qazanıñ ekologiya aqibetlerini azlaştırmaq içün basqı quvetleştirmege çağıralar.
Telegram, WhatsApp ve Facebookta Suspilne Qırım haberlerine abune oluñız
