Rostov-na-Donudaki Cenübiy bölgeniñ arbiy makemesi işğal etilgen Qırım sakinini 22 senege apiske aldı. Onı demiryolda patlavlarnıñ teşkil etilmesinde ve Ukraina mahsus hızmetlerinen işbirliginde qabaatladı. Cezasınıñ ilk 5 yılını apishanede, qalğanını ise sert rejimli müstemlekede keçirecek.
"Ğolos Krımu" (''Qırım Sesi'') agentliginiñ bildirgenine köre, adamğa 1 million rublelik (420 biñ ğrıvnâ) para cezası da berildi.
Taqiqatnıñ malümatına köre, adam 2022 senesi Ukraina istihbaratınen bağ qurdı, patlayıcı cihazlarnıñ azırlanuvını ögrendi ve 2023 senesi bozarğan ayda Qırımda demiryollarnı patlattı.
Başqa şeylernen beraber, Rusiye taqiqatçıları, qabaatlanğan adam, atış, vizual nezaret ve konspiratsiya, şu cümleden, makyaj vastasınen körünişiniñ deñiştirilmesinde bilgi ve ameliy beceriklerni aldı, dep bildirdi. Bundan ğayrı, onı yaqıt anbarlarında patlavlarnıñ azırlanmasında ve bölgede yük trenlerine zarar ketirmesinde qabaatlaylar.
Makeme onı Rusiye Federatsiyasınıñ Ceza qanunnamesiniñ bir sıra maddesini bozğanında qabaatladı, şu cümleden "devlet hainligi", "teraktlar", "patlayıcı cihazlarnıñ qanunsız yapılması" ve "terror faaliyetine azırlıq körüv".
Telegram, WhatsApp ve Facebookta Suspilne Qırım haberlerine abune oluñız
