"Sarı şerit" areketiniñ iştirakçileri işğal etilgen topraqlardan, hususan Qırım, Donbas ve Herson vilâyetinden Yañı yıl hayırlavlarını yolladılar.
Areket öz Telegram kanalında qara qış ayınıñ 1-nde bunı bildirdi.
"Sarı Şerit" areketi Ukrainanıñ vaqtınca işğal etilgen topraqlarından Yañı yıl hayırlavlarını yolladı. Haberler Aqyar (Sevastopol), Bağçasaray, Kezlev (Yevpatoriya), Makiyivka ve Geniçesk şeerlerinden keldi.
"Bütün qıyınlıqlarğa baqmadan, kelecek Yañı yılnı serbest ukrain şeerlerimizde qayd etmek içün küreşmege devam etemiz", — dep qayd ettiler "Sarı Şerit" koordinatorları.
Hatırlatamız ki, Rusiye işğalinde, şu cümleden muqavemet köstermege devam etken Qırımda, yaşağn ukrainlerge qol tutmaq içün Ukraina nezaretindeki topraqlarnıñ sakinleri "Ukraina vaqtına köre qayd etemiz" adlı fleşmobnı teşkil ettiler.
Hususan, ilk qış ayınıñ 30-nda Aqmescitteki (Simferopoldaki) baş narat yanında ukrain tarafdarı aktsiyası olıp keçti. Bundan ğayrı, "Sarı Şerit" areketiniñ bildirgenine köre, şeerniñ Puşkin soqağında ukrain bayraqlarınen stikerler tarqatıldı.
Telegram, WhatsApp ve Facebookta Suspilne Qırım haberlerine abune oluñız
