Qırımtatar Milliy Meclisi cemaat teşkilâtlarınen işbirlikniñ yañı formatını meydanğa ketirecek. Bu teşebbüs, ortaq faaliyetini pekitmek ve qırımtatarlarnıñ esas meselelerini semereli şekilde çezmege bağışlanğan.
Bunı Qırımtatar Milliy Meclisiniñ reisi Refat Çubarov 2024 senesiniñ neticeleri aqqında matbuat konferentsiyasında bildirdi.
"Men Meclis azalarına qırımtatar cemaat teşkilâtlarınıñ temsilciligini yañı formatta ğayrıdan tiklemege teklif etecegim, böylece printsipial meseleler tek Meclis azaları tarafından degil, cemaat teşkilâtlarınıñ iştiraginen baqılacaq. Kelecek aftalar bizler böyle şuralar aqqında qanunlarnı yazacaqmız, olarnı cemiyetnen muzakere etecekmiz. Eger umumiy añlaşmağa kelsek, böyle bir qarar faaliyetimizni pekitir", — dep bildirdi Çubarov.
Aynı zamanda, Çubarov tamır halqınıñ temsil etilmesi meselesinde Ukraina ükümetinen işbirlikniñ müimligini qayd etti. Onıñ aytqanına köre, soñki vaqıtları konstruktiv körüşüvler olıp keçti.
"Men ve Meclisniñ reisiniñ birinci muavini Nariman Celâl Ukraina vitse baş naziri, bölge inkişaf meseleleri nazirinen körüştik. Körüşüvimiz pek sıcaq edi, umumiy maqsadımız — ğalebe qazanmaq içün tamır halqlarınıñ rolü ve emiyeti aqqında laf ettik. Eminim ki, status ve temsil meselesi eñ yaqın vaqıtta çezilecektir", — dep qoştı Çubarov.
Telegram, WhatsApp ve Facebookta Suspilne Qırım haberlerine abune oluñız
