Qırım tarihçısı ve 17 senege maküm etilgen siyasiy mabüs Seitumer Seitumerov Vladimir şeerindeki apishanede ailesini bir yıldan çoq devamında ilk sefer ziyaret etti. Adam beş kilogramm azlaşqanını ve malümat boşluğını is etkenini ayttı.
"Qırım birdemligine" onıñ ömür arqadaşı Pakize Seitumerova bunı bildirdi.
"Teri pek ağarğan, çünki o sıq-sıq tışarı çıqmay, vitaminler yetmey", — dep qayd etti ömür arqadaşı.
Pakize şunı da ayttı ki, kamerada televizor olsa da, anda tek rus kanalları yayınlana, bunıñ içün mabüsler kerçek malümattan izolâtsiya etileler. Körüşüv vaqtında Seitumerov qorantasını dünyada olğan vaqialar aqqında çoq sora edi.
Şimdi tarihçı apishanede aftada altı kün çalışa, kilimlerni temizlemek içün fırçalar yapa. Bu iş içün o, şahsiy esapqa az aylıq ala.
"Hizb ut-Tahrir davası"nıñ üçünci Bağçasaray gruppası aqqında ne bilemiz
2020 senesi saban ayınıñ 11-nde Bağçasarayda qırımtatarlarnıñ bir qaç evinde tintüvler keçirildi: Enver Mustafayev, Amet Süleymanov, ağa-qardaş Seitumer ve Osman Seitumerovlar, olarnıñ dayısı Rustem Seitmetmetov.
Tutulğanlarnıñ episi 2003 senesinden berli Rusiyede yasaq etilgen "Hizb ut-Tahrir" teşkilâtınıñ azası olğanında qabaatlana. Ukraina toprağında ve dünyanıñ memleketleriniñ çoqusında teşkilât milliy qanunlar seviyesinde sıñırlanmayıp çalışa.
Dava malümatına köre, qabaatlanğanlarnıñ elinde silâ, patlayıcı maddeler, arbiy yedekler yoq edi, olar terror aktını yapmağa planlaştırmay ve başqalarını terror aktlarına çağırmay ediler. Dava malümatlarında Bağçasaray camilerinde diniy ve siyasiy mevzularda muzakerelerniñ audio yazıları bar.
Mayıs ayında "Memorial" uquq qorçalayıcı merkezi dört Qırım sakinin siyasiy mabüs olaraq tanıdı, olar "Hizb ut-Tahrir davası"nıñ üçünci Bağçasaray gruppasınıñ mabüsleri Seitumer Seitumerov, Osman Seitumerov, Amet Süleymanov ve Rustem Seitmetmetov.
2021 senesi orta küz ayınıñ 29-nda Rostov-na-Donudaki Cenübiy bölgeniñ arbiy makemesi ükümlerni qabul etti: Seitumer Seitumerov sert rejimli müstemlekede 17 sene, Osman Seitumerov 14 sene, Amet Süleymanov 12 sene, Rustem Seitmetov 13 senege maküm etildiler. Advokatnıñ bildirgenine köre, maküm etilgenlerniñ episi 3 sene ve 6 ay apishanede keçirmeliler.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız
