Qırım Muhtar Cumhuriyeti ve Aqyar (Sevastopol) şeeriniñ prokurorlığı, ukrain makemesi Qırım balaları ve gençleriniñ askeriyleştirilüvi, hususan yarımadada istilâcı devletniñ tasil standartlarınıñ kirsetilüvi içün mesüliyetli olğanlarnı ne qadar kere maküm etkenini ve bunıñ içün kimler şübeli olaraq tanılğanını bildirdi.
Bunı ilk qış ayınıñ 20-nde Qırım Muhtar Cumhuriyeti prokurorlığnıñ halqara işbirlik bölüginiñ yolbaşçısı İrına Bartsıtska "Rusiye Federatsiyasınıñ işğal etilgen topraqlardaki gençlik siyaseti telükeleri ve Ukraina gençlerini qoruv yolları" adlı tedbirde bildirdi. Tedbirni "Almenda" vatandaş maarif merkezi keçirdi.
Hususan, qorçalav altında bulunğan şahıslar arasında askerlik hızmetine göñülli olaraq qoşulmasını temin etmek maqsadınen yapılğan teşviqat içün (Cenk vaqtında vatandaş ealisini qoruv aqqında şartnamesiniñ 51-inci maddesiniñ talaplarını bozuv) "Rusiye Federatsiyasınıñ ordusı, aviatsiyası ve flotuna yardım etüv göñülli cemiyetiniñ bölge bölüginiñ yolbaşçıları"na şübe bildirildi.
Bu bozuv içün Kıyivniñ Podil rayon makemesi 2023 senesi bozarğan aynıñ 15-nde Aqyarda "Yunarmiya bölge ştabınıñ yolbaşçısı" Volodımır Kovalenkonı 10 senege apiske aldı.
Aynı vaqıtta Qırımdaki "Yunarmiya bölge ştabınıñ yolbaşçısı" Oleg Krıvoruçenkoğa qarşı cinaiy davanı makeme o ölgeninden sebep qapattı.
Bundan ğayrı, Ukraina makemesine Qırımdaki yañı "Yunarmiya bölge ştabınıñ yolbaşçısı" ve "Krımpatriottsentr"niñ işğalli müdirine qarşı qabaatlav aktları yollanıldı.
İşğal etilgen Qırımda istilâcı devletniñ tasil standartlarınıñ kirsetilüvine dair malümatqa köre, QMC prokurorlığı Qırımnıñ tasil, ilim ve gençlik nazirligine Ukraina Ceza qanunnamesiniñ 111-nci maddesiniñ 1-inci qısmında (Devlet hainligi) qayd etilgen cinayet işlegeninde şübeli olğanını bildirdi.
O, 2014 senesi oraq ayında bu vazifege keçip, Rusiye tarafını tuttı. Şübeli qadın 2019 senesi ilk qış ayına qadar yarımadada istilâcı devletniñ tasil standartlarını amelge keçirgen edi.
Bundan da ğayrı, Ukraina Ceza qanunnamesiniñ 111-1 maddesiniñ 3-nci qısmına (Kollaborativ faaliyet) binaen "Qırım cumhuriyet pedagogik tasil institutı"nıñ eki hadimi de şübeli olğanı aqqında bildirildi.
"Almendi"niñ malümatına köre, 2024 senesine 56,1 mlrd ruble (398 mln dollardan çoq) ayırılğan. 2025 senesine qadar Rusiye akimiyeti gençlik siyasetine 66 milliard ruble (469 million dollar) ayırdı.
"2021 senesinden başlap para arttırılması, büyük ihtimalnen, Ukrainağa tolu miqyaslı istilâğa azırlıq ve gençlerniñ Kreml qararlarını qabul etmek içün "doğru" şekilde azırlanmasına bağlıdır, bu da faal arbiy istilâ yılları devamında para arttırılmasını añlata", — dep ''Almenda''nıñ tedqiqatında qayd etildi.
Telegram, WhatsApp ve Facebookta Suspilne Qırım haberlerine abune oluñız
