Ukraina prezidentiniñ Qırım Muhtar Cumhuriyetindeki sabıq daimiy temsilcisi Tamila Taşeva bildirdi ki, halq mebusı vazifesinde işğal etilgen Qırım mevzusını diqqat ortasında tutmağa ve yarımadanıñ reintegratsiyasına qol tutmaq müimliginiñ mevzusını kenişletmege planlaştıra.
O, Ukraina prezidentiniñ Qırım Muhtar Cumhuriyetindeki Temsilciliginiñ ilk qış ayınıñ 17-de olıp keçken yıllıq brifingi vaqtında bunı bildirdi, dep Suspilne Qırım mühbiri haber etti.
Taşeva qayd etti ki, Temsilcilik vazifesinden ketken soñ, o, 2021 senesi Ukraina prezidenti tarafından tasdıqlanğan strategiya boyunca çalışmağa devam etecek.
Aynı zamanda, halq mebusı vazifesinde Qırım mevzusına diqqat etmege planlaştıra. Taşeva, soñki 10 yıl devamında Rusiye müessiseleri bu meselenen oğraşqanı içün, çetelde yarımada aqqında Ukraina tarafından aytmaq müim olğanını qayd etti.
"2025 senesi ukrain studiyalarınıñ meydanğa ketirilmesinde daa faal olacaq. Ne içün bu müim? Çünki ğarbiy demokratiyalarda akademik müit pek faal sürette polislerni şekillendire, bu devletlerniñ siyasetçilerini şekillendire. Yani, akademikler devletniñ qarar aluv esnasına tesir eteler. Şunıñ içün Qırımnı añlamaq siyasetini şekillendirmek içün bu akademik müitlernen çalışmaq pek müimdir", — dep qayd etti o.
Taşevanıñ aytqanına köre, bu leyha Temsilcilik tarafından devam ettirilecek, Temsilcilik ise parlament işi çerçivesinde qoşulacaq.
"Men bellesem, yaqında siz menim yerli idarenen oğraşqan parlament eyyetinden birine qoşulacağımnı bileceksiñiz", — dep bildirdi halq mebusı.
O, Qırım — Ukraina devletiniñ toprağıdır ve Ukraina ondan iç bir vaqıt vazgeçmeycek, dep qoştı. Ve er bir akimiyetniñ vekili içün bunı ifade etmek müimdir, dep qayd etti o.
Hatırlatamız ki, boş aynıñ soñunda Merkeziy saylav eyyeti Tamila Taşevanı Ukraina halq mebusı olaraq sayladı. O, "Ğolos" siyasiy firqasından mebus mandatından vazgeçüv aqqında ariza bergen İvan Prımaçenkonıñ nevbetteki namzetidir.
Tamila Taşeva aqqında ne bilemiz
Tamila Taşeva — ukrain ve qırımtatar devlet ve cemaat erbabı, "QırımSOS" cemaat teşkilâtınıñ tesisçisi. 2022 senesi çiçek ayınıñ 25-nden itibaren Ukraina prezidentiniñ Qırımdaki daimiy temsilcisi vazifesini becere edi. O, reintegratsiya siyasetiniñ işlep çıqarılması ve amelge keçirilmesinen oğraşa edi, em de işğalden azat etilecek Qırımnıñ reintegratsiyasına azırlıq körgen qanun leyhalarına qol tuta edi.
Hususan, Taşeva Qırım Muhtar Cumhuriyeti ve Sevastopol (Aqyar) şeeriniñ işğalden azat etüv ve reintegratsiya Strategiyasınıñ azırlanılmasında iştirak etti, em de Ukraina tamır halqlarınıñ statusı aqqında qanun, siyasiy sebeplernen taqip etilüvi sebebinden azatlıqtan marum etilgen şahıslar, vatandaş reineleri ve arbiy esirler aqqında qanun, Qırım sakinleri içün rezident olmağan statusnıñ lâğu etilmesi aqqında qanun azırlanılmasında iştirak etti.
Bundan da ğayrı, o, qırımtatar tiliniñ inkişaf kontseptsiyasına qoşuldı ve Qırım platformasınıñ tesis sammitiniñ teşkil etilmesinde iştirak etti.
Telegram, WhatsApp ve Facebookta Suspilne Qırım haberlerine abune oluñız
