İhtisasiy boksçu Oleksandr Usıknıñ ukrain taqımı Saudiy Arabistannıñ paytahtı Er-Riyağa keldi. Anda bir aftadan soñ britaniyalı Tayson Fyurige qarşı revanş küreşi olacaq. Bir kün evelsi TEAM USYK içün qırımtatar örnegini qullanıp, unikal urba yaratıldı.
Rtfight store öz Instagram saifesinde bu aqqında haber etti.
“Örnek: küç ve mirasnıñ qırımtatar timsalidir. Bu örnek İnsaniyetniñ sözlü ve maddiy olmağan medeniy mirası serlevalı eserleriniñ reprezentativ cedveline kirsetilgen ve çempionnıñ küçük vatanı olğan Qırımnıñ şerefini temsil ete”, — dep bildirildi.
Urbanıñ tüsü — boksçunıñ babasınıñ sevimli tüsü olğan mordır.
“Bu tek urba degil. Bu, cenkke azırlıq, birlik ve miras, çempionnıñ vatanınıñ yeñilmezligi aqqında bir mesajdır!”, — dep qayd etildi.
Hatırlatamız ki, Usık ve Fyuri arasında revanş küreşi ilk qış ayınıñ 21-nde Riyadede, Saudiy Arabistanda keçirilecek.
Ukraina boksçusı Taysonğa eki ay evelsi, berim ayında, küreşke azırlanmağa başladı. Revanşta Usık ardı-sıra 23-nci zenaat ğalebesini qazanmağa tırışacaq.
Telegram, WhatsApp ve Facebookta Suspilne Qırım haberlerine abune oluñız
