Rusiye tarafından qanunsız olaraq 11 senege azatlıqtan marum etilgen Qırım siyasiy mabüsi Vadım Bektemirov Rusiye Federatsiyasınıñ müstemlekesinde devamlı gipertonik krizilerden azap çeke. Onıñ basımı bayağı köterilip, sert tutuv şaraitinde bulunğanı sebebinden körme qabiliyeti bayağı fenalaştı.
Qırımtatar maaliy merkezine siyasiy mabüslerniñ tuvğanları bunı bildirdiler.
"SİZO ve apishaneniñ şaraiti sebebinden ağır baş ağrıları ola", — dep qayd eteler tuvğanları.
Tuvğanları ilâc ve vitaminlerni yollaylar, çünki müstemlekede oña bir şey berilmey.
QMMniñ qayd etkenine köre, Vadım Bektemirov tek tış dünyadan degil de, yaqınlarından da izolâtsiyada qala, çünki sert tutuluv şaraitinde körüşüvler yasaqtır. Keçenlerde qorantası, siyasiy mabüsniñ müstemlekege kelgende alınğan Qurannı yolladı.
"Vadım Bektemirovnıñ tutuluv vaziyeti Rusiye müstemlekesinde sistematik ameliyatnıñ bir parçasıdır. Onıñnen beraber müstemlekege çeşit milletlerden olğan musulmanlar keleler, olarnı sert şaraitlte, ceza izolâtorlarında ve kameralar kibi yerlerde tutalar", — dep bildirdi QMM.
Vadım Bektemirov aqqında ne bilemiz
- Vadım Bektemirov, arap edebiyatı ve gumanitar ilimler bölüginiñ "İslâm oquvları" ihtisasında magistrdir. Tevqif olunmadan evel siyasiy mabüslerniñ ailelerini destek etmek içün dua ete, epis etilgen qırımtatar musulmanlarına posılkalarnı yollamağa yardım ete, siyasiy sebepli davalarnıñ oturışlarına bara edi.
- 2020 senesi oraq ayınıñ 7-sinde Qırımdaki kütleviy tintüvlerden soñ Bektemirov tutuldı. O, 2003 senesinden başlap Rusiyede yasaqlanğan "Hizb ut-Tahrir"niñ faaliyetinde iştirak etmekte qabaalandı.
- 2022 senesi kiçik aynıñ 11-inde Rusiyedeki Cenübiy bölge arbiy makemesi Vadım Bektemirovnı 11 senege maküm etti. Ceza müddetiniñ birinci üç senesini apishanede keçirecek edi. 2023 senesi çiçek ayınıñ 3-ğnde Vlasıstaki Apellâtsiya arbiy makemesi ükümini deñiştirmedi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız
