2014 senesinden itibaren vaqtınca işğal etilgen Qırımda uquq qorçalayıcılar 104 insan hırsızlanğanını qayd ettiler, olardan 21 insanı ğayıp oldı. Bundan da ğayrı, 55 işkence adisesi qayd etildi, olarnıñ arasında uruv, elektrik şok qullanuvı, qurşunlar taqlit etilüvi ve başwa ruhiy terror şekilleri bar.
İlk qış ayınıñ 10-nda ZMINA insan aqları merkezi bu aqqında haber etti.
"Qırımda işğalli "makemeler" eñ az 15 jurnalist ve vatandaş jurnalistiniñ davalarında üküm çıqarıp, olarnı çeşit apis cezalarına maküm etti. Maküm etilgenlerniñ çoqusı — insan aqlarınıñ bozuluvı, işğalli akimiyetniñ qanunsız areketleri ve yarımadada sistemalı repressiyalar aqqında haber etken qırımtatarlardır", — dep uquq qorçalayıcılar qoştılar.
ZMINA bildirgeni kibi, yalıñız tolu miqyaslı istilâ başlağan soñ işğalli makemeler yarımadanıñ sakinlerine qarşı 1093 dava açtılar, 955-ine para cezalarını berdi.
Bundan ğayrı, 50 biñden çoq Qırımnıñ sakini Rusiye ordusına celp etilip, öz memleketine qarşı cenkleşmege mecbur etildi, işğal etilgen Qırımda yerleşken bölüklerden işğalli ordunıñ 1453 askeri elâk oldı, 950-i, büyük ihtimalnen, Ukraina vatandaşı edi.
Telegram, WhatsApp ve Facebookta Suspilne Qırım haberlerine abune oluñız