Rusiye işğalcileri tarafından Ukraina hayriye teşkilâtına para berüvde qabaatlanıp, 7 senege qanunsız olaraq maküm etilgen Appaz Kurtamet Pskovdaki taqiqat izolâtorında buluna.
Siyasiy mabüsniñ anası Ayşe Kurtamet Facebook saifesinde bunı yazdı.
O, qorantasına bu aqqında mektüpte yazdı. Onda Pskov SİZOa ilk qış ayınıñ 7-nde kirgenini ve anda bir afta devamında qalacağını yazdı.
"Telefon etmek içün men bir ariza yazdım, onı çıqarmağa tırışacağım, amma baqarmız. Er şey yahşı kibi körüne. Men bir özüm, amma bu menfiy bir şey degil, boş laflardan biraz yoruldım", — dep yazdı Appaz Kurtamet.
Appaz Kurtametniñ tutulması aqqında ne bilemiz
2022 senesi oraq ayınıñ 23. künü Appaz Kurtamet Novooleksiyivka qasabasından Qırımğa aqrabalarına ketti. “Çonğar” KÇKNda aqrabalarınen bağını coydı.
Birazdan belli oldı ki, RF Cinaiy qanunamesiniñ 208. maddesiniñ 1. qısmına binaen Appaznı terror teşkilâtına para bermege qabaatlağan rus quvetçileri oğlannı tuttılar. Taqiqatçılarnıñ sözlerine köre Appaz, "Noman Çelebicihan adına batalyon"da hızmet etken tanışına borc 500 grivna berdi.
Qırımtatar Maaliy Merkezi haber berdi ki, bu "dava"da qabaat, "gizlengen şaatlar"nıñ sözlerine ve rus quvetçilerinen faalca çalışqan böyle degen "mütehassıslar"nıñ neticesine esaslana. Davanen bağlı oturışlar, halqara uquq qaidelerini ciddiy şekilde bozdı, dep Merkez belley.
Umumen belli oldı ki, işğalli makeme Kurtamet içün 10 senelik üküm soradı.
2023 senesi çiçek ayınıñ 20. künü RF tarafından teşkil etilgen Aqmescit makemesi Appaz Kurtametni ukrain göñülli batalyonına para bermege qalaatlap, yedi senege maküm etti.
Telegram, WhatsApp ve Facebookta Suspilne Qırım haberlerine abune oluñız
