Ukraina, devlet hainligiUkraina CQniñ 111-nci maddesiniñ 1-nci qısmı içün VI. çağırılışnıñ Sevastopol (Aqyar) şeer şurasınıñ mebusını 11 senege maküm etti. O, Rusiyege qoltutqan mitinglerni teşkil etti ve 2014 senesi Qırımda sahte referendum keçirilmesine qoltuttı.
İlk qış ayınıñ 5-nde Qırım Muhtar Cumhuriyeti ve Aqyar şeeriniñ prokurorlığı bu aqqında haber etti.
"Bu areketlerinen maküm etilgen adam istilâcı devletke Ukrainağa qarşı, onıñ suvereniteti, topraq bütünligi ve toqunılmazlığına zarar ketirmek içün yapılğan bozuv faaliyetinde yardım etti", - dep bildirildi.
Yarımada işğal etilgen soñ "Yedinyaya Rossiya" firqasınıñ "Sevastopol bölügi" prezidiumınıñ erkânına kirdi, Qırım Ticaret-sanayı palatasınıñ yolbaşçısı ve "Yalta memuriyetiniñ reis muavini" vazifesinde çalıştı.
Bundan ğayrı, Ukraina havfsızlıq hızmetiniñ malümatına köre, maküm etilgen adam işğalcilerden Rusiye Mudafaa nazirliginde reberlik vazifesini aldı ve 2014-2015 seneleri işğalcilerge işğal etilgen Qırımda Ukraina Silâlı quvetleriniñ mülküni "milliyleştirmege" yardım etti.
Prokurorlıqnıñ malümatına köre, umumen devlet hainligi içün 17 Qırım Yuqarı Şurasınıñ mebusı ve 7 Aqyar şeer şurasınıñ mebusı ğıyabiy şekilde maküm etildi.
Qırım MC ve Aqyar şeeriniñ prokurorlığı Suspilne Qırımğa añlattı ki, qabatalanğan adam olmadan mahsus makeme oturışları ("ğıyabiy ükümler") neticesinde çıqarılğan ükümler umumiy şekilde aqqını qazanalar. Yani apellâtsiya şikâyetnamesi berilmese, apellâtsiya şikâyetnamesini berüv müddeti (üküm çıqarılğan 30 kün soñ) bitecek soñ aqqını qazanır.
Apellâtsiya şikâyetnamesi berilse ve lâğu etilmese, apellâtsiya makemesi qarar alacaq soñ üküm aqqını qazana. Aynı zamanda adam tutulğan vaqıttan berli ceza müddeti başlap sayıla.
Telegram ve Facebookta Suspilne Qırım haberlerine abune oluñız
