Bangkok International Book Fair 2024 vaqtında Thinknet Co., Ltd. şirketiniñ stendinde Ukrainanıñ vaqtınca işğal etilgen Qırımnı Rusiye Federatsiyasınıñ qısmı olaraq köstergen haritanı taptılar. Taylanddaki Ukraina elçihanesi muracaat etken soñ şirket afu soradı ve "Rusiye" yarımadasınen haritalarnı satıştan çıqardı.
Boş aynıñ 6-nda Ukraina Tış işleri nazirligi Facebookta bunı bildirdi.
Bundan da ğayrı, bu serginiñ teşkilâtçıları ukrain tarafınıñ fikirlerini köz ögüne alıp, nevbetteki Book Expo Thailand 2024 tedbirinde Ukraina toprağını doğru köstergen haritalarnı taqdim ettiler. Yañı haritalarda Qırım, Donetsk ve Luhansk vilâyetleri Ukrainanıñ qısmı olaraq qayd etildi.
"Suveren Ukrainanıñ sıñırları bozulmaz. Ukrainanıñ cian haritalarında doğru kösterilmesi ve onıñ topraq bütünligi ğayrıdan tiklenmesi içün çalışmağa devam etemiz!" — dep qayd etti TİNniñ matbuat hızmeti.
Telegram, WhatsApp ve Facebookta Suspilne Qırım haberlerine abune oluñız
