Rusiye quvetçileri tarafından 12 yılğa maküm etilgen qırımtatar faalcisi Eldar Kantımırovnı Ulyanovsk vilâyetindeki müstemlekede Burât Ulusına etap ettiler. Siyasiy mabüsniñ etapı bir ay devam etti.
"Qırım birdemligi" cemaat teşkilâtına siyasiy mabüsniñ apayı Elvina Useinova bunı bildirdi.
Onıñ aytqanına köre, adamnı Burât Ulusınıñ 8 apishanesine bir ay devamında alıp ketkenler. Şimdi o karantinde buluna.
"Bu pek qıyın edi. Onı, insanlar bir qaç kün, eñ çoq bir afta oturğanları iç bir vaqıt temizlenmegen, ŞİZOnıñ kirli kameralarına yerleştire ediler", — dep qayd etti Elvina Üseinova.
Müstemleke Aluştadan 7 biñ kilometr uzaqlıqta yerleşe, anda Kantımırov qorantasınen yaşay edi. Onıñ fikirince, adam Burât Ulusına etap etildi, çünki o, öz aqlarını qorumağa talap etti ve makemede aqlarınıñ bozuluvını red etti.
"Meniñ memuriyet temsilcisinen körüşüv aqqında bütün muracaatlarım körmemezlikke uruldı. Men, siyasiy mabüs statusım ve aq-uquqlarımnı ve qanuniyetimni qorçalamaq içün "aşırı" faalligim sebebinden Burât Ulusına etap etkenim aqqında laflar eşittim", — dep yazdı.
Hatırlatamız ki, Kantımırov etaptan evel Ulyanovsk vilâyetiniñ Dimitrovgradnıñ 1. apishanesinde bulunğan edi.
Eldar Kantımırov aqqında ne bilemiz
2017 senesi boş ayda OMON ve mahsus askerler Eldar Kantımırovnıñ evini ilk kere tinttiler. Bundan soñ bütün elektron cihazlarını alıp çıqardılar. İşğal quvetçileri ruhiy tesir eterek, onıñ evini çoq kere ziyaret ettiler. Qorquta ve Qırımdan ketmege ayra ediler.
Eldar Kantımırov cemaat faaliyetini yapmağa devam etti, tintüvler ve makeme oturışlarını faalca ziyaret ete edi, Aqnescit rayonınıñ Şumhay köyündeki "Salğır baba" musulman cemaatınıñ ayatında iştirak ete edi. Em Aluşta, em de Aqmescit rayonlarındaki bala bayramlarınıñ teşklilcisi edi.
2019 senesi bozarğan aynıñ 10-unda Kantımırov tutuldı, bundan evel dört qırımtatar adamınıñ evleri tintildi.
2021 senesi arman ayınıñ 16-sında RF Cenübiy bölge arbiy makemesi, Hizb ut-Tahrirniñ "Aluşta gruppası"nıñ iştirakçileri olğan Ruslan Nagayev, Eldar Kantımırov, Ruslan Mesutov ve Lenur Halilovğa üküm çıqardı. Adamlarnı "terror faaliyeti"nde qabaatlap, 13, 12 ve 18 senege maküm etti.
Telegram, WhatsApp ve Facebooka Suspilne Qırım haberlerine abune oluñız
