İşğalli Qırım Yuqarı makemesi qırım siyasiy mabüsiniñ adliyecisi Eldar Kantimirovnıñ onı defalarca ŞİZOğa yollağanları aqqında şikâyet arizasını qanaatlendirmedi.
"Qırım birdemligine" advokat Rustem Kamilev bunı bildirdi.
Qayd etilgenine köre, bu sene çiçek ayında Kamilev ve Kantimirov birinci seviyeli makemede Rusiye Federatsiyasınıñ Ulyanovsk vilâyetindeki 1 Dimitrovgrad apishanesiniñ ŞİZOğa çıqarılmasını şikâyet etmege tırıştılar. Kantımırov makemede Rusiye apishanesi memuriyeti oña mevsimge uyğun kiyim bermey, dep bildirdi. İşğalli Aqmescit rayon makemesi qırımtatarınıñ video qayd etüv cihazından alınğan videolarnı talap etmege red etti ve şikâyetni qanaatlendirmedi.
Advokat şunı da qayd etti ki, "Qırım Yuqarı makemesi" apellâtsiya basamağında video qaydını talap etmege ve şaatlarnı, baqşqa qırım siyasiy mabüsleri İzet Abdullayev, Raim Ayvazov ve Rustem Seithalilovnı çağırmağa red etti. Olar Kantımırovnıñ ŞİZOğa çıqarılmasını közetkenler, "Eldarnıñ cezalandırılmasını körgenler", ve "bu faktlarnı tasdıqlamağa azır ediler".
"Bizim fikirimizce, (bizim qoruv aqqımız — muar.) aqımız eki makeme tarafından da bozulğan. Biz buña toqtalmaycaqmız. Kassatsiyağa şikâyet etecekmiz ve aqiqatnı elde etecekmiz", — dep Kamilev qayd etti.
Eldar hastahanege alıp ketirildi ve apishanege qaytarılmaq kerek edi, amma apishanede oña qaytıp olamağanını ayttılar, ve onı müstemlekege yolladılar, dep qoştı o. Qırım siyasiy mabüsiniñ eşyaları Dimitrovgrad apishanesinde qaldı.
Ceza izolâtorında siyasiy mabüsniñ sağlıq meseleleri arttı. Eldar Kantimirovnı bel ağrısı ve bel siniri basqı raatsızlay. Tibbiy bölükke yazğan arizaları onı memnün etmedi. Em de ağrı sindromını çıqarğan mahsus tıbbiy halını alıp kettiler.
Eldar Kantımırov aqqında ne bilemiz
2017 senesi boş ayda OMON ve mahsus askerler Eldar Kantımırovnıñ evini ilk kere tinttiler. Bundan soñ bütün elektron cihazlarını alıp çıqardılar. İşğal quvetçileri ruhiy tesir eterek, onıñ evini çoq kere ziyaret ettiler. Qorquta ve Qırımdan ketmege ayra ediler.
Eldar Kantımırov cemaat faaliyetini yapmağa devam etti, tintüvler ve makeme oturışlarını faalca ziyaret ete edi, Aqnescit rayonınıñ Şumhay köyündeki "Salğır baba" musulman cemaatınıñ ayatında iştirak ete edi. Em Aluşta, em de Aqmescit rayonlarındaki bala bayramlarınıñ teşklilcisi edi.
2019 senesi bozarğan aynıñ 10-unda Kantımırov tutuldı, bundan evel dört qırımtatar adamınıñ evleri tintildi.
2021 senesi arman ayınıñ 16-sında RF Cenübiy bölge arbiy makemesi, Hizb ut-Tahrirniñ "Aluşta gruppası"nıñ iştirakçileri olğan Ruslan Nagayev, Eldar Kantımırov, Ruslan Mesutov ve Lenur Halilovğa üküm çıqardı. Adamlarnı "terror faaliyeti"nde qabaatlap, 13, 12 ve 18 senege maküm etti.
Telegram ve Facebookta Suspilne Qırım haberlerine abune oluñız
