Kıyivde "Molodist" 53-ünci Kıyiv halqara kinofestivalinde orta küz ayınıñ 30-nda ilk sefer qırımtatar künü olıp keçti. Seyircilerge rejissör Ahtem Seitablayevniñ "Başqasınıñ duası" filmi taqdim etildi ve rejissörnıñ yañı kinematografik leyhası añlatıldı.
Suspilne Qırım mühbiri bu aqqında haber berdi.
Rejissör Ahtem Seitablayevniñ aytqanına köre, "Molodist" kinofestivalinde ilk sefer qırımtatar künü olıp keçti. Buña qadar tek mevzuğa ait levhalar taqdim etilgen edi. O, Ekinci cian cenki vaqtında Qırımda 88 yeudiy balanı qurtarğan qırımtatar qızı Sayde Arifovanıñ ikâyesini añlatqan "Başqasınıñ duası" filmini taqdim etti.
Rejissör özü şimdi meşur ikâye olğan "Gramota ğayıp oldı" filminiñ yañı versiyası üzerinde çalışa.
"Lviv dostlarımnen beraber stsenariy yazdıq. Bu, efsaneviy ukrain "Gramota ğayıp oldı" filmine yapılğan bir omajdır. Amma biz ondan fabula qısmını aldıq. Bir qaç spoyler: bugün eki asker cebeden Moskovağa keteler, şu Leninniñ mezarını alıp ketmek içün, çünki o boldurdı. Amma esas maqsdı — Ukrainağa Pılıp Orlıknıñ ukrain tilinde yazılğan Anayasasını qaytarmaq. Şimdi Mudafaa nazirliginiñ Baş istihbarat idaresiniñ temsilcilerinen beraber "Baştan qara" ameliyatı aqqında video çıqarmaq içün çalışamız", — dep tarif etti Ahtem Seitablayev.
Aynı vaqıtta ukrain tarihçısı ve teleyayıncısı Gülnara Abdulayeva Qırım tarihı aqqında aytmaq kerek olğanını qayd etti.
"Bunı muzakere etmek kerek. Çünki Qırım tek kino içün meydan degil, bu tek facialı bir ikâye degil, aynı zamanda inkişaf ikâyesidir. Bunı adım-adım yapıp köstermek kerek, qomşumız nasıl olğanını köstermek kerek", — dep qayd etti Gülnara Abdullayeva.
Telegram, WhatsApp ve Facebookta Suspilne Qırım haberlerine abune oluñız
