Kıyivde "Molodist" 53-ünci Kıyiv halqara kinofestivalinde ayrı qırımtatar künü taqdim etilecek. Seyircilerge rejissör Ahtem Seitablayevniñ "Başqasınıñ duası" filmini kösterecekler. Filmniñ kösterilüvi orta küz ayınıñ 30-nda "Kino evi"nde keçirilecek.
"Qırım evi"niñ Facebook saifesinde bu aqqında haber etildi.
Film festivalinde seyircilerge "Başqasınıñ duası" filmi taqdim etilecek, dep bildirildi. Film, Ekinci cian cenki vaqtında alman işğali vaqtında Qırımda yüz bergen kerçek vaqialarğa esaslana.
Bundan da ğayrı, "Hatıra ve kelecek: Qırım kino ve medeniyette, qaytaruv tarihı" adlı panel munaqaşası beklenile.
"Munaqaşa Qırımnıñ Ukrainanıñ kinematografiyasında, sanatında ve medeniy mirasında müim rolüne bağışlana. İştirakçiler — belli qırımtatar sanatçıları, jurnalistler. Olar milliy mirasnı saqlav ve Qırım aqqında kerçek tasavurnı haber ve medeniy cenk şaraitinde saqlav vastaları olaraq kino ve medeniyetniñ emiyetini aydınlatacaqlar", — dep bildirildi.
Film festivaliniñ musafirleri qırımtatar milliy urbaları ve "Qırım kimligi" süslemesi sergisini de köre bileler.
"Er kes qırımtatarlarnıñ milliy urbaları, ev eşyaları ve 19-ncı asır bezeklerini körip olur. Kolleksiyanı 2021 senesi "Yol" leyhası çerçivesinde yarattılar. Leyhanıñ kuratorı — ressam, keramikaçı Rustem Skibin", — dep qoştılar "Qırım evi".
Qırım ibadethaneleri ve 1944 senesi qırımtatarlarnıñ tuvğan toprağından sürgün etilmesine bağışlanğan resim sergisi de olacaq.
Telegram, WhatsApp ve Facebookta Suspilne Qırım haberlerine abune oluñız
