14 senege maküm etilgen qırıtatar vatandaş jurnalisti Osman Arfimemetov Krasnoyarsk kraynıñ Minusinsk apishanesinde 22 kilogrammğa azlaştı.
"Qırım birdemligine" onıñ anası Emdie Arifmemetova bunı bildirdi.
Onıñ aytqanına köre, oğlu şimdi sert tutuv şaraitinde (STŞ) buluna ve oña telefon etmege yasaq etile. Lâkin ne içün onı STŞe yerleştirgenleri belli degil, Osman mektüplerinde bunı yazmay.
Qayd etilgenine köre, bütün mabüslerge, diniy sebeplerden qırımtatarnı aşamağan domuz etini aşatalar. Arifmemetovnıñ azıq yemegeninden ğaliba, o pek zayıf oldı.
"Çoq şikâyet etmey, bir şey aytmay. Qısqası, bilgenimiz bu. (...) Ne içün o, o qadar çoq kilo bergeni aqqında tasavvurım yoq. (...) Sırt ağrısı sebebinden terapevtke muracaat etti. Terapevt qabul etti, teşkerüv yaptı, baqıp çıqtı — qan talili normal, yahşı, amma siydigi yaramay. Ve bu büyreklernen bağlı, dediler. Onıñ büyreklerinen bağlı bir mesele bar eken. Ne olğanını bilmeyim — er şeyni tekrar aytmay", — dep tarif etti Emdie Arifmemetova.
O şunı da bildirdi ki, tibbiy bölükniñ yolbaşçısı qırım siyasiy mabüsine tek eki ilâc — bel ağrısı içün "Voltaren" ve siydik bezinen bağlı infektsiyalar içün içilgen "Kanefron"nı almağa izin berdi. Bu qorantalarnıñ episi bir posılka yollamağa rica ettiler. Osmanğa kerek ola bilecek başqa ilâclar ekimlernen muzakere etilmeli.
"Hizb ut-Tahrir davası"nıñ ekinci Aqmescit gruppası aqqında ne bilemiz
2019 senesi saban ayınıñ 27-sinde Qırımda qırımtatarlarnıñ evlerini kütleviy şekilde tinttiler. Aqmescit rayonınıñ Bavurçı, Mamaq, Yañı Abdal meskün yerlerinde taqiqat işleri yapıldı. İşğalciler, 20 qırımtatar adamını Hizb ut-Tahrir halqara siyasiy fırqasına ait olmakta qabaatlatıp tuttılar.
Rus mahsus hızmetleri daa üç insannı qıdırmağa ilân ettiler. 2019 senesi saban ayınıñ 28-inde Rusiyeniñ Rostov vilâyetiniñ Aqsay şeerinde daa üç qırımtatar adamını tutqanını bildirdiler. Tutulğan adamlar arasında "Qırım birdemligi"niñ içtimaiy jurnlisti Osman Arifmemetov da bar edi.
Aynı kün işğal etilgen Aqmescitteki Kıyiv rayon makemesi, tutulğan adamlarnı tevqif etip maküm etti.
2019 senesi yaz mevsiminde "Hizb ut-Tahrir davası"nıñ bu gruppasında tutulğan insanlarnıñ sayısı 25ke arttı. Tutulğanlar arasında "Qırım birdemligi" içtimaiy uquq qorçalayıcı areketiniñ faalcileri çoq edi. Olar, Qırımda siyasiy sebepli taqipler fedalarını qorçalamağa yönelten faal işinen bellilerdi. Olar arasında uquq qorçalayıcılar, içtimaiy jurnalistler ve gönüllüler bar.
Çoq bilgi olğanı sebebinden işğalciler 25 iştirakçinen cinaiy davanı beşer gruppağa böldiler.
2022 senesi boş aynıñ 24-ünde Rostov-na-Donudaki Cenübiy bölge arbiy makemesi, davanıñ iştirakçilerini terror faaliyetinde ve akimiyet zapt etmekte qabaatlı tanıdı. Enver Ametov ve Yaşar Müedinov 13 senege, içtimaiy jurnalistler Roslan Süleymanov, Rustem Şeyhaliyev ve Osman Arifmemetov 14 senege maküm etildi. Siyasiy mabüsler dört sene apishanede geçirecek soñ bir sene areket sıñırlanmaları astında olacaqlar. Qabaatlanğan adamlar öz qabaatını tanımadılar ve taqip etilgenlerini siyasiy olğanını tüşüneler.
Telegram, WhatsApp ve Facebookta Suspilne Qırım haberlerine abune oluñız
