Abakandaki IK-33 müstemlekesinde tutulğan qırımtatar jurnalisti ve siyasiy mabüsi Remzi Bekirov, aman-aman üç aftadır qorantasınen bağ qurmay. Onıñ soñki mektübi makeme oturışında keldi, anda onıñ kassatsiya şikâyeti baqıldı.
Jurnalistniñ apayı Halide Bekirova "Qırım birdemligi" cemaat teşkilâtına bunı bildirdi.
Halide Bekirovanıñ aytqanı kibi, aqayı müstemlekege kelgen berli, esassız qabaatlavlar sebebinden sıq-sıq ceza izolâtorında (ŞİZO) buluna edi.
«Men, onıñ apayı olaraq, onıñ içün pek qasevetlenem. Onen ne olğanını, şimdi ne yerde olğanını, ya da onı kene ŞİZOda tutıp-tutmağanlarını bilmeyim. Çünki orta küz ayınıñ 2-nde soñki mektübini yazğan vaqıt o, daima ceza izolâtorında bulunğan edi, bundan da ğayrı, tamamen esassız qabaatlavl altında edi», — dedi Halide Bekirova.
Halidenıñ aytqanına köre, Remzi Bekirov daima ahlâqiy basqı ve sert tutuv şaraitinen qarşılaşa. Arman ayından berli o, baş kiyimini kiymegeni ya da gece namaz qılğanı içün bir qaç kere ŞİZOda qapatılğan edi.
"Oña mektüp yazmağa, telefon etmege imkân bermeyler, onıñ içün ondan haber alamaymız", — dep Halide qoştı.
O, prokurorlıqtan ve fFederal Cezalandıruv hızmetinden aqayına yapılğan basqı toqtatılmasını talap etip, resmiy şikâyetlerni yolladı.
Remzi Bekirov aqqında ne bilemiz
Remzi Bekirov — Qırım sakinlerine qarşı siyasiy sebepli davalarda tintüv ve makemelerniñ onlayn yayınlarını alıp barğan içtimaiy jurnalisttir. O, Qırımdaki siyasiy mabüslerniñ qorantalarına yardım etmek ğayesiniñ teşebbüsçisidir. Onıñ üç çağına yetmegen balası bar.
2019 senesi saban ayınıñ 27-nde Qırımda kütleviy tintüvler keçirildi. Taqiqat tedbirleri esasen qırımtatarlarnıñ yaşağanları Aqmescit civarındaki Bavurçı, Mamaq, Yañı Abdal köylerinde keçirildi. O vaqıt Rusiye FSBniñ hadimleri yigirmi insannı tuttılar. Daa üçü bir qaç kün içinde Rostov-na-Donu şeerinde tutuldı, üçü qıdıruvğa ilân etildi. Daa soñ bu iş üzerinde daa eki qırımtatar adamı tutuldı.
25 qırımtatar cemaat faalcisi "Hizb ut-Tahrir" islâm siyasiy firqasında iştirak etkeninde qabaatlandı. Apiske alınğanlarnıñ çoqusı "Qırım birdemligi" uquq qorçalayıcı birleşmesiniñ iştirakçileridir. Şaban Umerov, Remzi Bekirov, Riza İzetov ve Raim Ayvazov Rusiye Ceza qanunnamesiniñ 205.5 maddesiniñ 1-inci qısmına binaen terror teşkilâtınıñ faaliyetini teşkil etüvde qabaatlanalar.
2022 senesi saban ayınıñ 10-nda Rostov-na-Donudaki Cenübiy bölge arbiy makemesi, uquq qorçalayıcı Remzi Bekirovnı 19 senege maküm etti.
2024 senesi oraq ayında Bekirovnı Rusiyeniñ Krasnoyarsk vilâyetindeki 2. Yeniseysk apishanesinden çıqardılar. Bundan evel onı Qırımğa yaqın olğan Rusiye Federatsiyasınıñ Rostov vilâyetindeki müstemlekesine etap etmege red etken ediler. Adam tek maküm etilecek soñ etap yerine şikâyet etmek mümkün eken.
Qırım siyasiy mabüsi, 2024 senesi saban ayında müstemlekede bulunğan vaqıt apis cezasına qadar müddetini esapqa almağa tırıştı. Amma Bekirovnıñ davası baqılğan Çita şeeriniñ 2-nci Şarqiy bölge arbiy makemesi cevap yollamadı, ve müddetniñ ğayrıdan sayılması aqqında qararnı qabul etmedi. Bu sebepten qırımtatar apishanede belgilengen müddetten çoq tutuldı.
Telegram, WhatsApp ve Facebookta Suspilne Qırım haberlerine abune oluñız
