Estoniya Cumhuriyetiniñ parlamenti (Riyğikoğu) 1944 senesi sovet rejimi tarafından qırımtatar halqınıñ sürgünliginiñ genotsid olaraq tanılması aqqında arizanı qabul etti.
Estoniya parlamentiniñ saytında bu aqqında aytıldı.
Arizada qırımtatarlarnıñ kütleviy sürgünligi ve Qırım yarımadasından zorbalıqnen sürgün etilüvi takbih etile. Vesiqada ayrıca qayd etildi ki, Rusiye Federatsiyası 2014 senesi Qırımnı işğal etken soñ qırımtatarlarnıñ kimligini yoq etmek içün genotsid siyasetini devam ete.
"Estoniya Ukrainağa qoltutqanını tasdıqlay ve Qırım platformasınıñ er seviyesinde faal iştirak etip, devletimizniñ topraq bütünliginiñ ğayrıdan tiklenilmesine öz deñişmegen nazar noqtasını köstere", — dep Ukraina prezidentiniñ Qırım Muhtar Cumhuriyetindeki temsilciliginiñ haberinde bildirildi.
Estoniya Cumhuriyeti qırımtatar halqınıñ sürgünligini genotsid olaraq tanığan altıncı memleket oldı.
Qırımtatar halqınıñ sürgünligi
1944 senesi mayıs ayınıñ 18. künü küneş doğğanda qırımtatar halqını Qırımdan sürgün etmee başladılar. Devlet mudafaa eyyetiniñ "Qırımtatarlar aqqında" gizli emrine köre bütün halq hainlik ve duşmannen işdeşlikte qabaatlandı ve Qırımdan sürgün etmege maküm etildi. Afta devamında bu operatsiyağa azırlanğan ediler, 32 biñ NKVSçısı oña qatıldı.
Deyerli üç devrinde Qırımdan tahminen 200 biñ qırımtatar sürgün etildi. Yolda ve ğurbette ilk senelerde sürgün etilgenlerniñ 46%-i öldi.
Çoqusı allarda Orta Asiyadaki cumhuriyetlerge, şu cümleden Özbekistanğa insanlarnı alıp ketigenler. 10 biñ qırımtatar, cebeden Qırımğa qaytqan Qırmızı ordunıñ askeri de sürgün etildi. 12 sene devamında qırımtatarlarnıñ mahsus köçken statusı bar edi, vatandaş ve insan aqları ve azatlıqlarından marum etildi.
1989 senesi sürgün etilgenlerge Qırımğa qaytmağa resmen izin berdiler.
2015 senesi Yuqarı Şura, qırımtatar halqınıñ sürgünligini genotsid olaraq tanıdı.
Telegram, WhatsApp ve Facebookta Suspilne Qırım haberlerine abune oluñız
