Rusiye tarafından eñ azından 29 ukrain jurnalisti ve üç jurnalist-kombatant esir alındı. Olarnıñ çoqusı —yarımadanıñ işğalinden soñ adise-vaqialarnı aydınlatqan Qırım matbuat vastalarınıñ temsilcileridir.
Kütleviy haber institutı bunı bildirdi.
Olar qayd etkenlerine köre, eñ azından 16 qırım jurnalisti Rusiye esirliginde buluna. Hususan, 2016 senesi işğal etilgen yarımadada Rusiye Federatsiyası Oleksiy Bessarabovnı qanunsız olaraq apiske aldı. O vaqıt o, "Nomos" analitik merkezi içün çalışa edi ve "Qara deñiz havfsızlığı" mecmuası içün yaza edi. Rusiye işğalcileri jurnalistni casuslıq ve diversiyada qabaatlaylar. Rusiye makemesi onı 14 senege üküm etti.
Rusiye Federatsiyasınıñ esirliginde Dmıtro Ştıblikov da buluna, onı da 2016 senesi Qırımda tuttılar. Adamnı casuslıq ve diversiya azırlağanında qabaatlaylar. Sahte makeme ceryanı neticesinde Ştıblikov 14 senege üküm etildi.
Cemaat jurnalisti, "Qırım birdemligi" strimeri Seyran Saliyev 2017 senesi orta küz ayında Rusiye tarafından esir alındı. Onı işğal etilgen Bağçasarayda beş qırımtatarnen beraber tuttılar. İşğalciler onı ukrain istihbaratınıñ emirinen diversiya azırlağanında qabaatlaylar. 2020 senesi "Hizb ut-Tahrir" davasında uydurılğan terrorizmde qabaatlanıp, 16 senege maküm etildi. Adam Tula vilâyetiniñ müstemlekesinde qanunsız ceza çekmekte.
Vatandaş jurnalisti, "Qırım birdemligi" teşebbüsiniñ göñülli Marlen Asanov da 2017 senesi orta küz ayında Seyran Saliyev ve başqa qırımtatarlarnen beraber Rusiye esirligine oğradı. Olarnıñ episi "Hizb ut-Tahrir" olğan "terror teşkilâtınıñ faaliyetini teşkil etüvde" qabaatlandı. 2020 senesi berim ayınıñ 16-nda Rostov-na-Donudaki Rusiye makemesi Asanovnı 19 senege apiske aldı.
İşğalcilerniñ bölgedeki insan aqları bozuvları ve repressiyalarını aydınlatqan qırım cemaat jurnalisti Timur İbragimov, 2017 senesi başqa qırımtatarlarnen beraber ruslar tarafından tutuldı. O, Rusiyede yasaq etilgen "Hizb ut-Tahrir"niñ ekinci Bağçasaray gruppası davası çerçivesinde maküm etildi. 2020 senesi berim ayınıñ 16-ında rusiye makemesi adamnı 17 senege maküm etti.
Bundan da ğayrı, "Qırım birdemligi" cemaat birleşmesiniñ idarecisi Server Mustafayev de Rusiye esirligine oğradı. O, siyasiy sebeplernen bağlı davalarnıñ aydınlatılmasınen oğraşa edi. 2018 senesi "Hizb ut-Tahrir davası"nıñ "ekinci Bağçasaray gruppası" çerçivesinde mabüslerniñ evleri tintilgen soñ, o ve başqa mabüsler apiske alındı. 2020 senesi berim ayınıñ 16-nda Rusiyeniñ Rostov-na-Donu şeerindeki Cenübiy bölge arbiy makemesi onı müstemlekede 14 senege üküm etti. Soñki malümatqa köre, o, Rusiyeniñ Tambov şeerindeki 33. müstemlekede qanunsız ceza çekmekte.
Qırımtatar cemaat jurnalisti ve faalcisi Osman Arifmetovnı işğalciler 2019 senesi saban ayında yaqaladılar. Bu, qırımtatar faalcileriniñ, hususan "Qırım birdemligi" cemaat teşebbüsiniñ vekilleriniñ evlerinde keçirilgen kütleviy tintüvler vaqtında oldı. Bir qaç başqa faalcilernen beraber o, Rusiyede yasaq etilgen "Hizb ut-Tahrir" teşkilâtında iştirak etkeninde qabaatlandı. 2022 senesi boş aynıñ 24-nde Rostov-na-Donu Cenübiy bölge arbiy makemesi Arifmetovnı sert rejimli müstemlekede 14 senege üküm etti.
Remzi Bekirov da 19 senege qanunsız olaraq üküm etildi. Onı 2019 senesi saban ayında işğalciler qırımtatar faalcileriniñ evlerinde keçirilgen tintüvler vaqtında tuttılar. Bekirov, siyasiy sebeplerden yapılğan tintüvler ve makemelerden yayınlar alıp bardı. Bundan da ğayrı, o, qırımtatarlarğa qarşı repressiyalarnı aydınlattı. 2020 senesi Rostov-na-Donudaki Cenübiy bölge arbiy makemesi onı terroristik faaliyet ve akimiyetni zapt etmek ıntıluvında qabaatlap, 19 senege maküm etti.
2019 senesi saban ayında Rusiye quvetçileri Ruslan Süleymanovnı da yaqaladılar. 2022 senesi Rostov-na-Donudaki Cenübiy bölge arbiy makemesi onı terror faaliyetinde ve akimiyetni zapt etmege ıntıluvında qabaatlap, 14 senege maküm etti.
2019 senesi saban ayında qırımtatarlarnıñ evlerinde keçirilgen kütleviy tintüvler vaqtında Rustem Şeyhaliyev de yaqalandı. İşğalciler onı "Hizb ut-Tahrir" teşkilâtında iştirak etkeninde qabaatlaylar. 2022 senesi boş aynıñ 24-nde Rostov-na-Donudaki Cenübiy bölge arbiy makemesi terrorist faaliyeti ve akimiyetni zapt etmege ıntıluvında qabaatlap, Şeyhaliyevni 14 senege apiske aldı.
"Qırım birdemliginiñ" qırımtatar cemaat jurnalisti Amet Süleymanovnı 2021 senesi orta küz ayında işğalciler "terror teşkilâtınıñ faaliyetinde iştirak etkeni"nde qabaatlap, 12 senege maküm ettiler.
2021 senesi Rusiye tarafından qırımtatar jurnalisti Asan Ahtemov da esir alındı. İşğalciler onı terrorist faaliyetinde ya da yasaqlanğan teşkilâtlarda iştirak etkeninde qabaatlap tuttılar.
"Qırım birdemligi" ve "Grani.ru" neşriyatınıñ mühbiri Vilen Tevriyanov 2022 senesi esirlikke tüşti. İşğalciler, adam Ukraina istihbaratınıñ buyruğı ile diversiya azırlağanını tüşüne. 2023 senesi rusiyeliler onı vaqtınca işğal etilgen Qırımdan qanunsız sürette çıqardılar. Jurnalistniñ SİZOda körüvi bayağı fenalaştı. 2023 senesi Vilen Temerânov aşayt ve SİZOda areketsiz yaşayış tarzınen bağlı olğan miden ağrısından şikâyet ete edi.
Ernes Ametov, qırımtatar jurnalisti, 2017 senesi "Qırım birdemligi"niñ başqa faalcilerinen apiske alındı. 2022 senesi ilk qış ayınıñ 29-nda Rostov-na-Donudaki Cenübiy bölge arbiy makemesi onı terroristik faaliyetinde ve "Hizb ut-Tahrir" teşkilâtınen işbirliginde qabaatlap, 11 senege apiske aldı. Ametovnı teşkilât faaliyetinde ve akimiyetni zorbalıqnen zapt etüvge azırlağanında qabaatladılar.
2024 senesi saban ayında Qırımda qırımtatar jurnalisti ve faalci Rustem Osmanovnı da yaqaladılar. Rusiyeniñ kontrolindeki Aqmescitteki Kıyiv rayon makemesi Osmanovnı terroristik teşkilâtta iştirak etkeninde qabaatlap apiske aldı, bundan soñ onı SİZOda 2024 senesi boş aynıñ 4-ne qadar qaldırdı.
Bu yılnıñ baarinde "Qırım birdemligi"niñ vatandaş jurnalisti ve mühbiri Aziz Azizovnı da yaqaladılar. O, Bağçasarayda yaqalanıp, mayısnıñ 4-ne qadar apiste tutuldı. Bundan soñ makeme SİZOda tutulğan müddetini 2024 senesi boş aynıñ 4-ne qadar uzattı. Onı terroristik faaliyetinde qabaatlaylar.
Hatırlatamız ki, işğalciler esir alınğan ukrain askerini işğal etilgen Qırımda çıqmağa tırışqanı içün maküm ettiler.
Telegram, WhatsApp ve Facebookta Suspilne Qırım haberlerine abune oluñız
