Moldovada Prezident saylavlarından evel haber ve havfsızlıq hızmetiniñ (HHH) ricasınen daa yedi teşviqat saytı — altı Rusiye ve bir Moldova saytı blok etildi. Olardan dört Rusiye saytı — Rusiye tarafından işğal etilgen Qırımnıñ "KHVKütleviy haber vastaları" ve yerli "parlament".
Moldova Haber ve havfsızlıq hızmeti bunı bildirdi.
HHHniñ haberi berim ayınıñ 25-nde internet provayderlerine yollanıldı.
İşğal etilgen Qırım parlamentiniñ saytından (crimea.gov.ru) ğayrı, aşağıdaki teşviqat media-portalları blok etildi:
- RİA "Novosti" ve RİA "Novosti Krım" (ria.ru, crimea.ria.ru);
- "Mustaqil gazeta" (ng.ru);
- "Qırım gazetası" (gazetacrimea.ru);
- "Qırım teleradiosı" (crimea24tv.ru).
İrişim, bütün Moldovan provayderleriniñ müşterileri içün qapatıldı, ve portalğa kirmege tırışqanda havfsızlıq telükesi aqqında tenbiyelev peyda ola.
Arman ayında HHH, internet provayderlerine, Rusiye "Promsvâzbank"nıñ saytlarını blok etmege emir etti. Aynı vaqıtta, 2023 senesi, Rusiyeniñ Sputnik haber agentliginen bağlı beş sayt qapatıldı.
Moldovadaki saylavlar aqqında neler belli
Moldova prezidentiniñ saylavları orta küz ayınıñ 20-nde saylayıcılarğa, Moldovağa Avropa Birligine qoşulmağa imkân berecek anayasa deñişmelerine qoltutqanlarını soraycaq referendumnen bir sırada keçirilecek.
Reuters haber etkeni kibi, rey berüvlerinde 10 namzetke qarşı Sandunıñ liderligi bar, olarnıñ arasında Rusiyege qoltutqan muhalifet firqaları tarafından desteklengen ve işten boşatılğan baş prokuror Oleksandr Stoyanoğlo ve em Ğarp, em de Rusiyenen sıq bağ qurmağa istegen Renato Vusatıy bar.
Maya Sandu — mustaqil Moldovanıñ birinci qadın prezidenti. 2020 senesi o, saylavlarnıñ ekinci turında 57,6% qazanıp, öz raqibi, memleketniñ evelki prezidenti İgor Dodonnı yeñdi.
2023 senesi ilk qış ayında Maya Sandu prezident vazifesine ekinci kere namzetlik köstermek niyetinde olğanını bildirdi. O, Moldovanıñ parlamentini memleketniñ Avropa Birligine kirmek istegi aqqında referendumğa azırlanmağa çağırdı.
Memleketniñ Anayasasına binaen, Moldova prezidenti dört yıllıq müddetke saylana ve ant etken kününden başlap vazifege başlay. Devlet yolbaşçısı vazifesine saylav aqqı olğan, 40 yaşına kelgen, Moldova Cumhuriyetinde eñ az 10 sene yaşağan ve devlet tilini bilgen vatandaş namzet ola bile.
Telegram ve Facebookta Suspilne Qırım haberlerine abune oluñız
